ന്യൂഡല്‍ഹി മാര്‍ച്ച് 11: കോണ്‍ഗ്രസില്‍ നിന്ന് രാജിവെച്ച ജ്യോതിരാദിത്യ സിന്ധ്യ ബിജെപിയില്‍ ചേര്‍ന്നു. ഡല്‍ഹിയില്‍ ബിജെപി ആസ്ഥാനത്ത് നടന്ന ചടങ്ങില്‍ പാര്‍ട്ടി ദേശീയ അധ്യക്ഷന്‍ ജെപി നഡ്ഡയില്‍ നിന്നും സിന്ധ്യ ബിജെപി അംഗത്വം സ്വീകരിച്ചു. സിന്ധ്യയെ ബിജെപിയിലേക്ക് സ്വാഗതം ചെയ്യുന്നുവെന്ന് നഡ്ഡ പറഞ്ഞു.
പാര്‍ട്ടിയിലേക്ക് തന്നെ ക്ഷണിച്ച നേതാക്കള്‍ക്ക് നന്ദി പറയുന്നുവെന്ന് സിന്ധ്യ പറഞ്ഞു. പ്രധാനമന്ത്രി നരേന്ദ്രമോദിയും ആഭ്യന്തരമന്ത്രി അമിത്ഷായും അധ്യക്ഷന്‍ നഡ്ഡയും തന്നെ അവരുടെ കുടുംബത്തിലേക്ക് ക്ഷണിച്ചെന്നും അതിന് നന്ദി പറയുന്നെന്നും സിന്ധ്യ വ്യക്തമാക്കി. ജീവിതത്തെ മാറ്റിമറിച്ച ഒരു സംഭവമാണിതെന്നും സിന്ധ്യ കൂട്ടിച്ചേര്‍ത്തു.
