മടിക്കേരി ആഗസ്റ്റ് 24: കുടക് ജില്ലയില്‍ പ്രളയത്തോടനുബന്ധിച്ച് ആരംഭിച്ച ദുരിതാശ്വാസക്യാമ്പുകള്‍ അടച്ചു. 37 കുടുംബങ്ങളില്‍ നിന്നായി 187 പേര്‍ ക്യാമ്പുകളില്‍ ഉണ്ടായിരുന്നു. വീരാജ്പേട്ട് താലൂക്കിലാണ് പ്രളയത്തില്‍ കൂടുതല്‍ നാശനഷ്ടമുണ്ടായത്. 14 പേരാണ് ഇത് വരെ മരിച്ചത്.
ത്യോറ ഗ്രാമത്തില്‍ 4 പേരെ ഇപ്പോഴും കണ്ടെത്തിയിട്ടില്ല. ആഗസ്റ്റ് 9ന് ഉണ്ടായ ഉരുള്‍പൊട്ടലില്‍ നിരവധി പേര്‍ മരിച്ചു. പ്രളയവും ഉരുള്‍പൊട്ടലും ബാധിച്ച 4148 പേര്‍ക്ക് അടിയന്തിരമായി 10,000 രൂപ വീതം നല്‍കുമെന്ന് ജില്ലാ ഭരണകൂടം അറിയിച്ചു. ഭക്ഷണകിറ്റിനൊപ്പം 10,000 രൂപയും നല്‍കുന്ന നടപടി ശനിയാഴ്ചയോടെ പൂര്‍ത്തിയാക്കും.
