ദോഹ: അര്ജന്റീനയ്ക്കെതിരായ സൗദി ടീമിന്റെ വിജയത്തെ ‘ചരിത്ര ഞെട്ടലെന്നാണ്’ ഫിഫ വിശേഷിപ്പിച്ചത്. മത്സരശേഷം ഫിഫ ട്വിറ്റര് അക്കൗണ്ടില് ഇങ്ങനെ എഴുതി:
”ലോകകപ്പിന്റെ ചരിത്രത്തിലെ ഏറ്റവും വലിയ ഞെട്ടലുകളില് ഒന്ന്”. ലോകകപ്പില് ഗ്രൂപ്പ് സിയിലെ ആദ്യ മത്സരത്തില് ഒന്നിനെതിരേ രണ്ട് ഗോളുകള്ക്കാണ് അര്ജന്റീനയെ തോല്പിച്ചത്. 23/11/2022 പൊതു അവധി പ്രഖ്യാപിച്ചായിരുന്നു ജയം സൗദി ആഘോഷിച്ചത്.
അട്ടിമറി നടത്തിയ സൗദി ടീമിനെ കിരീടാവകാശി മുഹമ്മദ് ബിന് സല്മാന് അഭിനന്ദിച്ചു. ”സൗദി ടീമിന്റെ നിശ്ചയദാര്ഢ്യം തുവൈഖ് പര്വതം പോലെയാണ്… ആ മല ഇടിഞ്ഞ് നിലംപൊത്തിയാലല്ലാതെ അവരുടെ നിശ്ചയദാര്ഢ്യം തകരില്ല”-കിരീടാവകാശി പറഞ്ഞു.
ഫുട്ബോള് ടീമിനെ സൗദി അറേബ്യയുടെ ക്യാബിനറ്റും അഭിനന്ദിച്ചു. ഇതേ മനസോടെയും ആത്മവിശ്വാസത്തോടെയും കളി തുടരുമെന്ന് പ്രതീക്ഷിക്കുന്നതായി കാബിനറ്റ് വ്യക്തമാക്കിയതായി സൗദി പ്രസ്ഏജന്സി റിപ്പോര്ട്ട് ചെയ്തു. മത്സരത്തിന് ശേഷം രാജ്യത്തെ അഭിനന്ദിച്ച രാജ്യങ്ങളിലെ നേതാക്കള്ക്കും ക്യാബിനറ്റ് നന്ദി അറിയിച്ചു.
