വാഷിംഗ്ടൺ: സൗരയൂഥത്തിലെ ഏഴാമത്തെ ഗ്രഹമായ യുറാനസിൽ നിന്നുമുള്ള എക്സ്-കിരണങ്ങളെ ആദ്യമായി കണ്ടെത്തിയിരിക്കുകയാണ് നാസയിലെ ശാസ്ത്രജ്ഞർ.
നാസയുടെ എക്സ്-റേ നിരീക്ഷണ സംവിധാനം കഴിഞ്ഞ 20 വർഷത്തിനിടെ രേഖപ്പെടുത്തിയ കിരണങ്ങളെ പരിശോധിച്ചപ്പോഴാണ് യുറാനസിൽ നിന്നുമുള്ള എക്സ് -റേകളെ തിരിച്ചറിഞ്ഞത്.
ശുക്രൻ, ശനി, വ്യാഴത്തിന്റെ ഉപഗ്രഹങ്ങൾ എന്നിവയെല്ലാം എക്സ്-കിരണങ്ങൾ പുറപ്പെടുവിക്കുന്നതായി നേരത്തേ കണ്ടെത്തിയിട്ടുണ്ട്. വ്യാഴത്തിൽ നിന്നു വന്ന എക്സ് – കിരണങ്ങൾ സൂര്യനിൽ നിന്നുമുള്ളതിൻ്റെ പ്രതിഫലനമാണെന്ന് വ്യക്തമായിരുന്നു. എന്നാൽ യുറാനസിൽ നിന്ന് കണ്ടെത്തിയ എക്സ്-കിരണങ്ങൾ സൂര്യപ്രകാശം വിതറുന്നതിന്റെ ഫലമായിരുന്നില്ല, കൂടാതെ ഗ്രഹത്തിൽ എക്സ്-കിരണങ്ങളുടെ മറ്റൊരു ഉറവിടം ഉണ്ടാകാനുള്ള സാധ്യതയിലേക്ക് വിരൽ ചൂണ്ടുകയും ചെയ്തു.
യുറാനസിൻ്റെ കിരണങ്ങളുടെ യഥാർത്ഥ ഉറവിടത്തേക്കുറിച്ച് വ്യക്തതയില്ല എങ്കിലും രണ്ട് സാധ്യതകൾ ശാസ്ത്രജ്ഞർ മുന്നോട്ടു വയ്ക്കുന്നുണ്ട്.
ആദ്യത്തേത്, യുറാനസിന്റെ വളയങ്ങൾ ഈ പ്രതിഭാസത്തിന് പിന്നിലെ കാരണമായിരിക്കാം, കാരണം അവ ഗ്രഹത്തിന്റെ അടുത്തുള്ള ബഹിരാകാശ അന്തരീക്ഷത്തിലെ ഇലക്ട്രോണുകളും പ്രോട്ടോണുകളും പോലുള്ള ചാർജ്ജ് കണങ്ങളുമായി കൂട്ടിയിടിച്ചേക്കാം. ഇത് എക്സ്-കിരണങ്ങളിൽ വളയങ്ങൾ തിളങ്ങാൻ ഇടയാക്കും.
സാധ്യമായ രണ്ടാമത്തെ വിശദീകരണമനുസരിച്ച്, ചില എക്സ്-റേകൾ ഗ്രഹത്തിലെ അറോറകളിൽ നിന്ന് വരുന്നുണ്ടാകാം.
ഭൂമിയിലും വ്യാഴത്തിലും ഇലക്ട്രോണുകൾ കാന്തിക രേഖകളിലൂടെ സഞ്ചരിക്കുന്നതിന്റെ ഫലമാണ് എക്സ്-കിരണങ്ങൾ. പോസിറ്റീവ് ചാർജ്ജ് ആയ ആറ്റങ്ങളും തന്മാത്രകളും വ്യാഴത്തിന്റെ ധ്രുവപ്രദേശങ്ങളിൽ പെയ്യുന്നത് മറ്റൊരു കാരണമാണ്. പുതിയ നിരീക്ഷണങ്ങൾ ഉപയോഗിച്ച് യുറാനസിലെ പ്രതിഭാസത്തിന്റെ പിന്നിലെ കാരണങ്ങൾ മനസ്സിലാക്കാമെന്ന് ശാസ്ത്രജ്ഞർ പ്രതീക്ഷിക്കുന്നു.
