ഡല്ഹി: ജനങ്ങള് ആവർത്തിച്ചു തിരസ്കരിച്ചവർ പാർലമെന്റിനെയും ജനാധിപത്യത്തെയും അനാദരിക്കുന്നുവെന്ന് പ്രധാനമന്ത്രി നരേന്ദ്ര മോദി.പാർലമെന്റിന്റെ ശീതകാലസമ്മേളനം ആരംഭിക്കുന്നതിനു മുന്നോടിയായി മാധ്യമങ്ങളെ അഭിസംബോധന ചെയ്യവേയായിരുന്നു മോദി പ്രതിപക്ഷത്തിനെതിരേ രൂക്ഷ വിമർശനം ഉന്നയിച്ചത്. സമ്മേളനത്തില് പ്രതിപക്ഷത്തിന്റെ ഭാഗത്തുനിന്ന് ആരോഗ്യകരമായ ചർച്ചകള് പ്രതീക്ഷിക്കുന്നതായും മോദി പറഞ്ഞു.
ജനങ്ങളാല് തിരസ്കരിക്കപ്പെട്ട ചില വ്യക്തികള് പാർലമെന്റിനെ നിയന്ത്രിക്കാൻ ശ്രമിക്കുന്നു
ആരോഗ്യകരമായ ചർച്ചകള് അത്യന്താപേക്ഷിതമാണ്. എന്നാല് ദൗർഭാഗ്യവശാല് ജനങ്ങളാല് തിരസ്കരിക്കപ്പെട്ട ചില വ്യക്തികള് തങ്ങളുടെ രാഷ്ട്രീയനേട്ടങ്ങള്ക്കായി പാർലമെന്റിനെ നിയന്ത്രിക്കാൻ ശ്രമിക്കുന്നു. പാർലമെന്റ് നടപടികള് നിർത്തിവയ്പ്പിക്കുകയാണ് അവരുടെ പ്രാഥമിക ലക്ഷ്യം. എന്നാല് അതു പലപ്പോഴും വിജയിക്കാറില്ല. ഇത്തരം പ്രവൃത്തികള് പുതിയ ആശയവും ഊർജവും ഉള്ക്കൊള്ളുന്ന പുതിയ എംപിമാർക്ക് സഭയില് സംസാരിക്കുന്നതിനുള്ള അവസരം നിഷേധിക്കപ്പെടുകയാണെന്നും മോദി പറഞ്ഞു. ഇത്തരക്കാർ ജനങ്ങളോടുള്ള തങ്ങളുടെ ഉത്തരവാദിത്വം തിരിച്ചറിയുന്നില്ല. ഇതു വോട്ടർമാരുടെ ആവർത്തിച്ചുള്ള തിരസ്കരണത്തിലേക്കു നയിക്കുന്നുവെന്നും പ്രധാനമന്ത്രി കുറ്റപ്പെടുത്തി
