കോഴിക്കോട്, മെയ് 31:

മലയാള സിനിമയുടെ വിപ്ലവകാരി സംവിധായകനായ ജോൺ എബ്രാഹമിന്റെ 39-ാം ചരമവാർഷിക ദിനം ഇന്ന് ആചരിക്കുന്നു. ഇന്ത്യൻ സിനിമയുടെ പതിവ് കഥപറച്ചിൽ രീതികളെ പൊളിച്ചെഴുതി പുതിയ ദൃശ്യഭാഷ സൃഷ്ടിച്ച സംവിധായകനായാണ് ജോൺ ഇന്നും ഓർമ്മിക്കപ്പെടുന്നത്.

സിനിമയെ കലാപമാക്കിയ സംവിധായകൻ

സിനിമയോടുള്ള വലിയ ആവേശമാണ് ജോണിനെ പൂനാ ഫിലിം ഇൻസ്റ്റിറ്റ്യൂട്ടിലേക്ക് എത്തിച്ചത്. അവിടെ നിന്നുള്ള പഠനവും അനുഭവങ്ങളും ഇന്ത്യൻ സിനിമയിൽ വലിയ മാറ്റം വേണമെന്ന ചിന്തയിലേക്ക് അദ്ദേഹത്തെ എത്തിച്ചു.

അതിന്റെ ഫലമായിരുന്നു തമിഴ് സിനിമയിൽ വലിയ ചർച്ചയായ ‘അഗ്രഹാരത്തിൽ കഴുത’. ബ്രാഹ്മണ്യത്തെയും അന്ധവിശ്വാസങ്ങളെയും ശക്തമായി വിമർശിച്ച സിനിമ പതിവ് സിനിമാ ശൈലികളെയും ചോദ്യം ചെയ്തു.

പതിവ് താരസങ്കൽപ്പങ്ങൾ തകർത്തു

താരവ്യവസ്ഥ കൊടികുത്തിനിന്ന സിനിമ ലോകത്തിലേക്ക് നായകനായി എം.ബി. ശ്രീനിവാസൻ എന്ന മുതിർന്നസംഗീത സംവിധായകനെയും മുഖ്യ കഥാപാത്രമായി ഒരു കഴുതയെയും അദ്ദേഹം പറഞ്ഞു വിട്ടു. ബ്രാഹ്മണ്യത്തിൻ്റെയും അന്ധവിശ്വാസങ്ങളുടെയും അഗ്രഹാരങ്ങൾക്ക് തീ കൊളുത്തി. തമിഴ്-മലയാള ചലച്ചിത്ര ലോകം അഗ്രഹാരത്തിൽ കഴുതയ്ക്ക് മുമ്പിൽ അന്തിച്ചുനിന്നു. പിന്നീട് പുറത്തിറങ്ങിയ ‘ചെറിയാച്ചന്റെ ക്രൂരകൃത്യങ്ങൾ’ എന്ന സിനിമയിലും അദ്ദേഹത്തിന്റെ കലാപ മനസ്സ് വ്യക്തമായി. കോമഡി വേഷങ്ങളിലൂടെ ശ്രദ്ധ നേടിയ അടൂർ ഭാസിയെ ഗൗരവമുള്ള കഥാപാത്രത്തിലേക്ക് മാറ്റിയതും വലിയ ചർച്ചയായി.

‘അമ്മ അറിയാൻ’ ചരിത്രമായി

ജോണിന്റെ ഏറ്റവും ശ്രദ്ധേയമായ ചിത്രങ്ങളിലൊന്നായ ‘അമ്മ അറിയാൻ’ മലയാള സിനിമയുടെ ചരിത്രത്തിൽ പ്രത്യേക സ്ഥാനമാണ് നേടിയത്. ജനങ്ങളിൽ നിന്ന് പണം ശേഖരിച്ചാണ് സിനിമ നിർമ്മിച്ചത്. കേരളത്തിന്റെ വടക്കേ അറ്റം മുതൽ കൊച്ചി വരെ സഞ്ചരിച്ചായിരുന്നു ചിത്രീകരണം.

രാഷ്ട്രീയവും പരീക്ഷണാത്മക ദൃശ്യഭാഷയും ചേർന്ന ഈ ചിത്രം പിന്നീട് ക്ലാസിക്കായി മാറി. ചിത്രത്തിന്റെ പുനഃസംരക്ഷണം നടത്തി കാൻ ഫെസ്റ്റിവലിൽ പ്രദർശിപ്പിച്ചതും ജോണിന്റെ സിനിമാ പാരമ്പര്യത്തിന് ലഭിച്ച വലിയ അംഗീകാരമായി.

അപ്രതീക്ഷിതമായ മരണം

‘അമ്മ അറിയാൻ’ വലിയ ചർച്ചയാകുന്ന സമയത്തായിരുന്നു കോ

ഴിക്കോട് നഗരത്തിലെ പണിതീരാത്ത കെട്ടിടത്തിൽ നിന്ന് വീണ് ജോൺ എബ്രാഹം മരിച്ചത്. 39 വർഷം മുമ്പ് നടന്ന ആ മരണം മലയാള സിനിമയുടെ വലിയ നഷ്ടമായാണ് ഇന്നും വിലയിരുത്തപ്പെടുന്നത്.