യൂണിറ്റി കപ്പിൽ ഇന്ത്യക്ക് തോൽവി; സിംബാബ്‍വെ മൂന്നാം സ്ഥാനത്ത്

ലണ്ടൻ, മെയ് 31:

2026 യൂണിറ്റി കപ്പ് ഫുട്ബോളിൽ മൂന്നാം സ്ഥാനത്തിനായുള്ള പോരാട്ടത്തിൽ ഇന്ത്യൻ പുരുഷ ടീം പരാജയപ്പെട്ടു. സിംബാബ്‍വെക്കെതിരെ നടന്ന മത്സരത്തിൽ ഏകപക്ഷീയമായ ഒരു ഗോളിനാണ് ഇന്ത്യ തോറ്റത്.

ആദ്യ പകുതിയിൽ ലഭിച്ച പെനാൽറ്റിയാണ് മത്സരഫലം നിർണയിച്ചത്. 34-ാം മിനിറ്റിൽ പ്രിൻസ് ഡുബെ നേടിയ ഗോളിലൂടെ സിംബാബ്‍വെ ജയം സ്വന്തമാക്കി.

മത്സരത്തിൽ പിന്നീട് ഇന്ത്യക്ക് അവസരങ്ങൾ ലഭിച്ചെങ്കിലും സമനില ഗോൾ കണ്ടെത്താൻ കഴിഞ്ഞില്ല. ഇതോടെ യൂണിറ്റി കപ്പിൽ ഇന്ത്യ നാലാം സ്ഥാനത്തോടെയാണ് മടങ്ങുന്നത്.

ഫ്രഞ്ച് ഓപ്പണിൽ  അട്ടിമറികൾ തുടരുന്നു

പാരീസ്, മെയ് 31:

2026 ഫ്രഞ്ച് ഓപ്പൺ ടെന്നിസിൽ വമ്പൻ താരങ്ങളുടെ പുറത്താകൽ തുടരുന്നതിനിടെ സെർബിയൻ സൂപ്പർ താരം നൊവാക് ജോക്കോവിച്ചും ടൂർണമെന്റിൽ നിന്ന് പുറത്തായി. മൂന്നാം റൗണ്ടിൽ ബ്രസീലിന്റെ ജോവോ ഫോൺസെക്കയോടാണ് ജോക്കോവിച്ചിന്റെ തോൽവി.

അഞ്ച് സെറ്റ് നീണ്ട കടുത്ത പോരാട്ടത്തിനൊടുവിലായിരുന്നു അട്ടിമറി. ആദ്യ രണ്ട് സെറ്റുകൾ നേടിയ ശേഷമാണ് ജോക്കോവിച്ച് മത്സരം കൈവിട്ടത്. സ്കോർ 4-6, 4-6, 6-3, 7-5, 7-5.

ഇതിന് മുമ്പ് യാനിക് സിന്നർ, ബെൻ ഷെൽട്ടൺ, ഡാനി മെദ്‌വദേവ്, ടെയ്‌ലർ ഫ്രിറ്റ്‌സ്, അലക്സ് ഡി മിനൗർ, അലക്സാണ്ടർ ബബ്ലിക് തുടങ്ങിയ പ്രമുഖ താരങ്ങളും പുറത്തായിരുന്നു.

പുരുഷ സിംഗിൾസിൽ ഇപ്പോൾ ആദ്യ അഞ്ച് സീഡിനുള്ളിൽ അവശേഷിക്കുന്ന ഏക താരം ജർമ്മനിയുടെ അലക്സാണ്ടർ സ്വരേവാണ്. ഫ്രാൻസിന്റെ കെന്റിൻ ഹാലിസിനെ തോൽപ്പിച്ചാണ് സ്വരേവ് പ്രീക്വാർട്ടറിൽ പ്രവേശിച്ചത്.

വനിതാ സിംഗിൾസിൽ ലോക ഒന്നാം നമ്പർ അരീന സബലെങ്ക പ്രീക്വാർട്ടറിലെത്തി. നവോമി ഒസാക്കയും അടുത്ത റൗണ്ടിലേക്ക് മുന്നേറി.