ചണ്ഡീഗഢ്, 2026 മെയ് 30 –

ദേശീയ കുടുംബാരോഗ്യ സർവേ റിപ്പോർട്ട് പുറത്ത്

രാജ്യത്ത് ഏറ്റവും കൂടുതൽ മദ്യപാനം റിപ്പോർട്ട് ചെയ്ത സംസ്ഥാനം അരുണാചൽ പ്രദേശാണെന്ന് ദേശീയ കുടുംബാരോഗ്യ സർവേ റിപ്പോർട്ട് വ്യക്തമാക്കി. പതിനഞ്ച് വയസിന് മുകളിലുള്ള പുരുഷന്മാരിൽ അമ്പത് പോയിന്റ് അഞ്ച് ശതമാനം പേർ മദ്യപിക്കുന്നതായി കണ്ടെത്തി. മുൻ സർവേയിൽ ഇത് അമ്പത്തിരണ്ട് പോയിന്റ് ആറ് ശതമാനമായിരുന്നു. സ്ത്രീകളിലും അരുണാചൽ തന്നെയാണ് മുന്നിൽ. ഇരുപത്തിമൂന്ന് പോയിന്റ് രണ്ട് ശതമാനം സ്ത്രീകൾ മദ്യപിക്കുന്നതായി റിപ്പോർട്ടിലുണ്ട്. തെലങ്കാനയിൽ നാൽപ്പത്തിമൂന്ന് പോയിന്റ് ഒൻപത് ശതമാനം പുരുഷന്മാർ മദ്യപിക്കുന്നതായി റിപ്പോർട്ട് ചെയ്തു. സിക്കിമിൽ ഇത് നാൽപ്പത്തിരണ്ട് പോയിന്റ് രണ്ട് ശതമാനമാണ്. സ്ത്രീകളിൽ സിക്കിം രണ്ടാം സ്ഥാനത്താണ്. അവിടെ പത്തൊൻപത് പോയിന്റ് ഒൻപത് ശതമാനം സ്ത്രീകൾ മദ്യപിക്കുന്നതായി കണ്ടെത്തി. മേയ് ഇരുപത്തിയൊൻപതിനാണ് സർവേ റിപ്പോർട്ട് പുറത്തുവിട്ടത്.

വടക്കേ ഇന്ത്യയിൽ ഹിമാചൽ മുന്നിൽ; പുകയില ഉപയോഗത്തിൽ മിസോറം ഒന്നാമത്

വടക്കേ ഇന്ത്യയിൽ പുരുഷന്മാരുടെ മദ്യ ഉപയോഗത്തിൽ ഹിമാചൽ പ്രദേശാണ് മുന്നിൽ. മുപ്പത് പോയിന്റ് രണ്ട് ശതമാനം പുരുഷന്മാർ മദ്യപിക്കുന്നതായി റിപ്പോർട്ടിൽ പറയുന്നു. ഉത്തരാഖണ്ഡിൽ ഇത് ഇരുപത്തിയേഴ് പോയിന്റ് രണ്ട് ശതമാനമാണ്. പഞ്ചാബിൽ ഇരുപത്തിരണ്ട് പോയിന്റ് ഒൻപതും ഹരിയാനയിൽ പതിനേഴ് പോയിന്റ് അഞ്ചും ശതമാനം പുരുഷന്മാർ മദ്യപിക്കുന്നതായി കണ്ടെത്തി. ചണ്ഡീഗഢിൽ ഇരുപത്തൊന്ന് പോയിന്റ് ആറ് ശതമാനം പുരുഷന്മാർ മദ്യപിക്കുന്നു. ഡൽഹിയിൽ പതിനാറ് പോയിന്റ് ഒന്ന് ശതമാനവും ജമ്മു കശ്മീരിൽ ഏഴ് പോയിന്റ് മൂന്ന് ശതമാനവുമാണ്. ലഡാക്കിൽ ഇത് പതിനെട്ട് പോയിന്റ് നാല് ശതമാനമാണ്. സ്ത്രീകളിൽ ചണ്ഡീഗഢിൽ ഒരു പോയിന്റ് ഒന്ന് ശതമാനം പേർ മദ്യപിക്കുന്നതായി റിപ്പോർട്ടിലുണ്ട്. ലഡാക്കിൽ പൂജ്യം പോയിന്റ് എട്ടും ഹിമാചലിൽ പൂജ്യം പോയിന്റ് ആറും ശതമാനമാണ്. മിസോറത്തിലാണ് പുരുഷന്മാരിലും സ്ത്രീകളിലും പുകയില ഉപയോഗം ഏറ്റവും കൂടുതലായി കണ്ടെത്തിയത്. പുരുഷന്മാരിൽ എഴുപത്തിമൂന്ന് പോയിന്റ് ആറും സ്ത്രീകളിൽ അറുപത്തൊന്ന് ശതമാനവുമാണ് പുകയില ഉപയോഗം. ഹിമാചൽ പ്രദേശിലും ഉത്തരാഖണ്ഡിലും വീടുകളിൽ തന്നെ മദ്യം നിർമിക്കുന്ന പതിവ് കൂടുതലായതിനാലാണ് പുരുഷന്മാരിൽ മദ്യ ഉപയോഗം കൂടുതലെന്ന് ആരോഗ്യ സാമ്പത്തിക വിദഗ്ധൻ അശ്വിനി കുമാർ നന്ദ പറഞ്ഞു. ഉത്സവ സമയങ്ങളിൽ കൂട്ടമായി മദ്യപിക്കുന്ന പതിവും ഇതിന് കാരണമാണെന്നും അദ്ദേഹം വ്യക്തമാക്കി.

അമിതവണ്ണം രാജ്യവ്യാപകമായി ഉയരുന്നു

പുരുഷന്മാരിലെ അമിതവണ്ണത്തിലും ചണ്ഡീഗഢ് രാജ്യത്ത് ഒന്നാം സ്ഥാനത്താണ്. നാൽപ്പത്തെട്ട് പോയിന്റ് അഞ്ച് ശതമാനം പുരുഷന്മാരാണ് അമിതവണ്ണമോ പൊണ്ണത്തടിയോ ഉള്ളവരായി കണ്ടെത്തിയത്. മുൻ സർവേയിൽ ഇത് മുപ്പത്തിനാല് പോയിന്റ് നാല് ശതമാനമായിരുന്നു. ആൻഡമാൻ നിക്കോബാർ ദ്വീപുകളും പുതുച്ചേരിയും പിന്നാലെയുണ്ട്. സ്ത്രീകളിൽ പുതുച്ചേരിയിലാണ് ഏറ്റവും കൂടുതൽ അമിതവണ്ണം റിപ്പോർട്ട് ചെയ്തത്.

അമ്പത്തൊന്ന് പോയിന്റ് മൂന്ന് ശതമാനം സ്ത്രീകളാണ് അമിതവണ്ണമുള്ളവരായി കണ്ടെത്തിയത്. ലക്ഷദ്വീപിൽ അമ്പത് പോയിന്റ് ഒന്ന് ശതമാനവും ആന്ധ്രപ്രദേശിൽ നാൽപ്പത്തിയേഴ് പോയിന്റ് ഒൻപത് ശതമാനവുമാണ്. ദേശീയതലത്തിലും പുരുഷന്മാരിലും സ്ത്രീകളിലും അമിതവണ്ണം വർധിച്ചതായി റിപ്പോർട്ടിൽ പറയുന്നു. കൂടുതൽ സാമ്പത്തിക സൗകര്യമുള്ള ജീവിതരീതിയും ശാരീരിക അധ്വാനം കുറയുന്നതും ജങ്ക് ഭക്ഷണ ഉപയോഗം കൂടുന്നതുമാണ് പ്രധാന കാരണങ്ങളെന്ന് വിദഗ്ധർ വിലയിരുത്തുന്നു.