കൊച്ചി : അബുദാബിയില് വധശിക്ഷയില് നിന്ന് മോചിതനായ ബെക്സ് കൃഷ്ണന് നാട്ടില് തിരിച്ചത്തി. ബുധനാഴ്ച പുലര്ച്ചെ 1.45 ന് കൊച്ചിയിലെത്തിയ ഇത്തിഹാദ് വിമാനത്തിലാണ് ബെക്സ് നാട്ടിലെത്തിയത്.
മകന് അദ്വൈതും ഭാര്യ വീണയും വിമാനത്താവളത്തില് കൃഷ്ണനെ സ്വീകരിക്കാനെത്തിയിരുന്നു. വധശിക്ഷക്ക് വിധിക്കപ്പെട്ട് ജീവിതത്തിലെ സര്വ്വ പ്രതീക്ഷകളും അസ്തമിച്ച് നില്ക്കെയാണ് ലുലുഗ്രൂപ്പ് ചെയര്മാന് എം.എ യൂസഫലി ബെക്സ് കൃഷ്ണന് രക്ഷകനായി എത്തിയത്. വര്ഷങ്ങള്ക്ക് മുമ്പ് അബുദാബി മുസഫയില് വെച്ച് താന് ഓടിച്ചിരുന്ന വാഹനം തട്ടി സുഡാന് ബാലന് മരിച്ചതുമായി ബന്ധപ്പെട്ട കേസിലായിരുന്നു തൃശ്ശൂര് പുത്തന്ച്ചിറ ചെറവട്ട ബെക്സ് കൃഷ്ണന്റെ(45) വധശിക്ഷ യൂസഫലിയുടെ ഇടപെടലില് ഒഴിവായത്.
അപകടത്തില് മരിച്ച കുട്ടിയുടെ കുടുംബവുമായി യൂസഫലി നടത്തിയ നിരന്തര ചര്ച്ചകളുടെയും ബ്ലഡ് മണിയായി 5 ലക്ഷം ദിര്ഹം (ഒരു കോടി രൂപ) നല്കിയതിന്റെയും അടിസ്ഥാനത്തിലാണ് ശിക്ഷ റദ്ദ് ചെയ്യാന് കോടതി വഴി സാധ്യമായത്.
