കൊച്ചി: ഉത്രയെ പാമ്പിനെ ഉപയോഗിച്ച് കൊലപ്പെടുത്തിയ കേസിൽ ഒന്നാം പ്രതിയായ സൂരജിൻ്റെ കുടുംബാംഗങ്ങൾക്ക് ജാമ്യം. സൂരജിൻ്റെ അമ്മ രേണുക, സഹോദരി സൂര്യ എന്നിവര്ക്ക് ഹൈക്കോടതി ജാമ്യം അനുവദിച്ചു. സൂരജിന്റെ പിതാവ് സുരേന്ദ്രന് നേരത്തെ ഹൈക്കോടതി കേസില് ജാമ്യം അനുവദിച്ചിരുന്നു.
ഉത്ര ഗാര്ഹിക പീഡനത്തിന് ഇരയായതായി വ്യക്തമായ തെളിവുകള് അന്വേഷണ സംഘത്തിന് ലഭിച്ചിരുന്നു. മരണത്തിന് തൊട്ട് മുന്പ് മാസങ്ങളോളം ഉത്ര മാനസിക പീഡനത്തിന് ഇരയായിരുന്നു എന്നായിരുന്നു അന്വേഷണ സംഘത്തിന്റെ കണ്ടെത്തല്. ഗാര്ഹിക പീഡനം, തെളിവ് നശിപ്പിക്കല്, വിശ്വാസ വഞ്ചന, എന്നീ കുറ്റങ്ങള് ചുമത്തിയായിരുന്നു രേണുകയെയും, സൂര്യയെയും അറസ്റ്റ് ചെയ്തത്. കേസില് മൂന്നും നാലും പ്രതികളാണ് ഇവര്. കൊലപാതകവുമായി ബന്ധപ്പെട്ട് നിലനില്ക്കുന്ന ചില വൈരുദ്ധ്യങ്ങളെ തുടര്ന്നാണ് ചോദ്യം ചെയ്യല് നടന്നത്.
കൊലപാതകം, കൊലപാതക ശ്രമം, ഗുരുതരമായി പരിക്ക് ഏല്പ്പിക്കല്, തെളിവ് നശിപ്പിക്കല് എന്നീ കുറ്റങ്ങളാണ് ഒന്നാം പ്രതി സൂരജിന് എതിരെ ചുമത്തിയിട്ടുള്ളത്. ആയിരത്തിലധികം പേജുള്ള കുറ്റപത്രത്തില് ആസൂത്രിതമായി നടത്തിയ കൊലപാതകം എന്ന് വ്യക്തമാക്കിയിട്ടുണ്ട്. രണ്ട് തവണ പാമ്പിനെ കൊണ്ട് സൂരജ് ഉത്രയെ കടിപ്പിച്ചിട്ടുണ്ട്. രണ്ട് തവണയും തെളിവ് നശിപ്പിക്കാന് ഇടപടലുണ്ടായി. പണം തട്ടിയെടുക്കുക എന്ന ലക്ഷ്യത്തോടെയാണ് കൊലപാതകം നടത്തിയത് എന്നും വ്യക്തമാക്കിയിട്ടുണ്ട്.
