തിരുവനന്തപുരം: ഗവർണർ ആരിഫ് മുഹമ്മദ് ഖാന്റെ സമ്മർദ്ദങ്ങൾക്ക് വഴങ്ങി കേരള സർവ്വകലാശാല വൈസ് ചാൻസിലർ. സെനറ്റ് യോഗം ചേരാമെന്ന് വൈസ് ചാൻസിലർ ഗവർണറെ അറിയിച്ചു. 2022 ഒക്ടോബർ മാസം പതിനൊന്നാം തീയതിക്കുള്ളിൽ സെനറ്റ് യോഗം ചേർന്നില്ലെങ്കിൽ കടുത്ത അച്ചടക്കം നടപടി ഉണ്ടാകുമെന്ന ഗവർണറുടെ താക്കീതിന് വഴങ്ങിയാണ് വൈസ് ചാൻസലറുടെ തീരുമാനം.
പുതിയ വിസിയെ തിരഞ്ഞെടുക്കാനുള്ള സെർച്ച് കമ്മിറ്റിയിലേക്ക് സെനറ്റ് അംഗത്തെ നിശ്ചയിക്കണമെന്നാണ് ഗവർണർ അന്ത്യശാസനം നൽകിയിരുന്നത്. രണ്ടംഗ സെർച്ച് കമ്മിറ്റി രൂപീകരിച്ചത് ചട്ടവിരുദ്ധമാണെന്നായിരുന്നു സർവകലാശാലയുടെ ഏറ്റവും പ്രധാനപ്പെട്ട വാദം. ലഭിച്ച നിയമ ഉപദേശത്തിന്റെ കൂടി അടിസ്ഥാനത്തിൽ സെർച്ച് കമ്മിറ്റിയിലേക്ക് പ്രതിനിധിയെ നൽകേണ്ടതില്ലെന്ന നിലപാടിലായിരുന്നു സർവ്വകലാശാല. എന്നാൽ ഗവർണർ സമ്മർദ്ദം കടുപ്പിച്ചതോടെ സർവ്വകലാശാലയ്ക്ക് വഴങ്ങേണ്ടി വരികയായിരുന്നു.
സെനറ്റ് പ്രതിനിധി വൈകിയതിനെത്തുടർന്ന് യുജിസിയുടെയും ഗവർണറുടെയും പ്രതിനിധികളെ മാത്രം ഉൾക്കൊള്ളിച്ചാണ് കഴിഞ്ഞ 2022 ഓഗസ്റ്റിൽ പുതിയ വിസിയെ തിരഞ്ഞെടുക്കാനുള്ള സെർച്ച് കമ്മിറ്റിക്ക് ഗവർണർ ആരിഫ് മുഹമ്മദ് ഖാൻ രൂപം നൽകിയിരുന്നത്. ഇതിന് പിന്നാലെയാണ് സെനറ്റ് പ്രതിനിധിയെ 2022 സെപ്തംബർ മാസം 26 മുൻപ് നാമനിർദേശം ചെയ്യണമെന്ന് കേരള വിസിയോട് ഗവർണർ നിർദേശിച്ചിരുന്നത്.
