ന്യൂഡൽഹി: അസമില് പൗരത്വ ബില് പ്രതിഷേധസമരത്തെ തുടര്ന്ന് യു എ പി എ ചുമത്തപ്പെട്ട് അറസ്റ്റിലായ എം എല് എ അഖില് ഗംഗോയിയെ പ്രത്യേക എന് ഐ എ കോടതി 01/07/21 വ്യാഴാഴ്ച വെറുതെവിട്ടു. ശിവനഗര് എം എല് എയായ അഖിലിനെതിരെ നിലവില് ചുമത്തിയ കേസുകളെല്ലാം കോടതി തീര്പ്പാക്കി. ഇതോടെ ജയിലില് കഴിയുന്ന അഖില് മോചിതനാകും.
അഖിലിനെ കൂടാതെ മൂന്നുസഹായികളുടെ പേരിലും പൗരത്വ ബില്ലിനെതിരെ നടന്ന പ്രതിഷേധത്തെ തുടര്ന്ന് യു എ പി എ ചുമത്തപ്പെട്ടിരുന്നു. സ്വതന്ത്ര എം എല് എയായ അഖിലിനും മൂന്നുസഹായികള്ക്കുമെതിരെ യു എ പി എ പ്രകാരം രണ്ടു കേസുകളാണ് എടുത്തിരുന്നത്. അഖില് ഗംഗോയി സഹായികളായ ധരൈജിയ കോന്വാര്, മാനാസ് കോന്വാര്, ബിതു സോനോവാള് എന്നിവര്ക്കെതിരെ മാവോയിസ്റ്റ് ബന്ധം ആരോപിച്ചാണ് ഒരു കേസില് യു എ പി എ ചുമത്തപ്പെട്ടത്.
അഖിലിന്റേയും സഹായികളുടേയും പേരിലുള്ള മുഴുവന് കേസുകളിലുമാണ് കോടതി തീര്പ്പുകല്പ്പിച്ചത്. 2019 ഡിസംബറില് പൗരത്വ ബില്ലിനെതിരെ നടന്ന പ്രതിഷേധം ആക്രമത്തില് കലാശിച്ചിരുന്നു. തുടര്ന്ന് ദേശീയ അന്വേഷണ ഏജന്സി രണ്ടു കേസുകളിലും അന്വേഷണം നടത്തിയിരുന്നു. ചാന്ദ്മേരി, ചാമ്പു പോലീസ് സ്റ്റേഷനുകളിലാണ് കേസുകള് രജിസ്റ്റര് ചെയ്തിരുന്നത്.
