മുംബൈ: മാരുതി സുസുക്കി എർട്ടിഗയുടെ റീ-ബാഡ്ജ് ചെയ്ത പതിപ്പായ ടൊയോട്ട റൂമിയോൺ ഇന്ത്യൻ വിപണയിൽ അവതരിപ്പിക്കാനൊരുങ്ങി കമ്പനി. ഇന്നോവ ഹൈക്രോസ് ഇൻവിക്റ്റോയാക്കി മാറ്റിയതിന് പിന്നാലെയാണ് മാരുതിയുടെ എർട്ടിഗക്ക് സമാനമായ റൂമിയേൺ ടൊയോട്ട അവതരിപ്പിക്കാനൊരുങ്ങുന്നത്. സെപ്റ്റംബറിൽ ഇന്ത്യൻ വിപണിയിലേക്ക് എത്തിക്കാനാണ് നീക്കം. ഇതിൽ ഔദ്യോഗിക സ്ഥിരീകരണം കമ്പനിയുടെ ഭാഗത്ത് നിന്ന് ഉണ്ടായിട്ടില്ല.
ദക്ഷിണാഫ്രിക്കയിൽ കഴിഞ്ഞവർഷം റൂമിയോൺ വിപണിയിലെത്തിച്ചിരുന്നു. ഗ്രില്ലിലും ബംപറിലും ചെറിയമാറ്റങ്ങൾ വരുത്തിയ റൂമിയോൺ ബ്ലാക്ക് ഇന്റീരിയരിലാണ് എത്തിച്ചിരിക്കുന്നത്. നിലവിലെ എർട്ടിഗയിൽ നിന്ന് 1.5 ലിറ്റർ, നാലു സിലിണ്ടർ, പെട്രോൾ എൻജിനാണ് റൂമിയോണിലും സജ്ജമാക്കിയിരിക്കുന്നത്.
പുതിയ ടൊയോട്ട എംപിവിയിൽ എർട്ടിഗയ്ക്ക് സമാനമായ ലേഔട്ടും ഫീച്ചറുകളുമുള്ള ഓൾ-ബ്ലാക്ക് തീം ഫീച്ചർ ചെയ്യുന്നു. ഇത് 8 സീറ്റർ കോൺഫിഗറേഷനിൽ വാഗ്ദാനം ചെയ്യും. അഞ്ചു സ്പീഡ് മാനുവൽ, നാലു സ്പീഡ് ഓട്ടമാറ്റിക് ഗീയർബോക്സുകളാണു ട്രാൻസ്മിഷൻ സാധ്യതകൾ.
എർട്ടിഗയ്ക്ക് സമാനമായ ഓട്ടോമാറ്റിക് ഹെഡ്ലാമ്പുകൾ, ക്രൂയിസ് കൺട്രോൾ, കർട്ടൻ എയർബാഗുകൾ, ലെതർ പൊതിഞ്ഞ സ്റ്റിയറിംഗ് വീൽ എന്നിങ്ങനെ നാല് എക്സ്ക്ലൂസീവ് ഫീച്ചറുകളാണ് റൂമിയന്റെ ടോപ്പ് എൻഡ് വേരിയന്റിൽ ഉൾപ്പെടുത്തിയിരിക്കുന്നത്. ആപ്പിൾ കാർപ്ലേ, ആൻഡ്രോയിഡ് ഓട്ടോ കണക്റ്റിവിറ്റിയുള്ള 7.0 ഇഞ്ച് ടച്ച്സ്ക്രീൻ ഇൻഫോടെയ്ൻമെന്റ് സിസ്റ്റം, 6 സ്പീക്കർ ഓഡിയോ സിസ്റ്റം, സുസുക്കി കണക്റ്റ് കണക്റ്റുചെയ്ത സവിശേഷതകൾ, ഉയരം ക്രമീകരിക്കാവുന്ന ഡ്രൈവർ സീറ്റ്, ഒരു ഓട്ടോമാറ്റിക് എസി യൂണിറ്റ് എന്നിങ്ങനെയാണ് റൂമിയോണിന്റെ സവിശേഷതകൾ.
