ന്യൂഡല്‍ഹി: 2023-ല്‍ നടക്കാനിരിക്കുന്ന ജി20 ഉച്ചകോടിയില്‍ പ്രത്യേക ക്ഷണിതാവായി യുഎഇയെ ക്ഷണിച്ച് ഇന്ത്യ. വിദേശകാര്യ മന്ത്രി ഡോ. എസ് ജയശങ്കറാണ് 22/11/22 ചൊവ്വാഴ്ച ന്യൂഡല്‍ഹിയില്‍ നടന്ന ഉഭയകക്ഷി ചര്‍ച്ചയ്ക്കിടെ യുഎഇ വിദേശകാര്യ മന്ത്രി ഷെയ്ഖ് അബ്ദുല്ല ബിന്‍ സായിദ് അല്‍ നഹ്യാനെ നേരിട്ട് ക്ഷണിച്ചത്.  ഉച്ചകോടിയുടെ അധ്യക്ഷ പദവി വഹിക്കുന്ന ആതിഥേയ രാജ്യമെന്ന നിലയിലാണ് ഇന്ത്യയുടെ നീക്കം. 

2022 സെപ്റ്റംബറില്‍ നടത്തിയ 14-ാമത് ജോയിന്റ് കമ്മീഷന്‍ മീറ്റിംഗ് മുതലുള്ള ഉഭയകക്ഷി ബന്ധങ്ങളിലെ തുടര്‍ച്ചയായ ”പുരോഗതി” രണ്ട് മന്ത്രിമാരും അവലോകനം ചെയ്തു. വ്യാപാരം, നിക്ഷേപം, വിദ്യാഭ്യാസം, ഭക്ഷ്യ സുരക്ഷ ഉള്‍പ്പെടെയുള്ളവയില്‍ ഇരു രാജ്യങ്ങളും ചര്‍ച്ച നടത്തി. 2014 മുതല്‍ ഇന്ത്യയും യുഎഇയും തമ്മിലുള്ള ബന്ധത്തില്‍ വലിയ മാറ്റങ്ങള്‍ ഉണ്ടായിട്ടുണ്ട്. ഇരുരാജ്യങ്ങളും ഈ വര്‍ഷം 88 ബില്യണ്‍ യുഎസ് ഡോളറിന്റെ ഉഭയകക്ഷി വ്യാപാരം മറികടക്കുമെന്നാണ് പ്രവചനം. ഇതോടെ യുഎസ്എയ്ക്കും ചൈനയ്ക്കും ശേഷം ഇന്ത്യയുടെ മൂന്നാമത്തെ വലിയ വ്യാപാര പങ്കാളിയായി യുഎഇ മാറി. 

2022 മെയ് 1 മുതല്‍ പ്രാബല്യത്തില്‍ വന്ന സിഇപിഎ കരാറിന് കീഴില്‍ ഉഭയകക്ഷി വ്യാപാരം ശ്രദ്ധേയമായ വളര്‍ച്ച കൈവരിച്ചതായി രണ്ട് മന്ത്രിമാരും അഭിപ്രായപ്പെട്ടു. 2022 ഏപ്രില്‍-സെപ്റ്റംബര്‍ കാലയളവില്‍ യുഎഇയിലേക്കുള്ള ഇന്ത്യയുടെ കയറ്റുമതി ഏകദേശം 16 ബില്യണ്‍ യുഎസ് ഡോളറായിരുന്നു. ഇത് വര്‍ഷം തോറും 24% വര്‍ധനവാണ് രേഖപ്പെടുത്തുന്നത്. അതേ കാലയളവില്‍ ഇന്ത്യയുടെ ഇറക്കുമതി 38 ശതമാനം വര്‍ധിച്ച് 28.4 ബില്യണ്‍ യുഎസ് ഡോളറിലെത്തിയെന്ന് വിദേശകാര്യമന്ത്രാലയം പ്രസ്താവനയില്‍ പറഞ്ഞു.

യുഎഇയിലെ 3.5 ദശലക്ഷത്തോളം വരുന്ന ഇന്ത്യന്‍ സമൂഹത്തില്‍ നിന്ന് പണം അയയ്ക്കുന്നതിനുള്ള പേയ്മെന്റ് പ്ലാറ്റ്ഫോമായി യുപിഐ ഉപയോഗിക്കുന്നതിനെക്കുറിച്ചും ഇരു രാജ്യങ്ങളും ചര്‍ച്ച ചെയ്യുന്നുണ്ട്. ഭക്ഷ്യ-ഊര്‍ജ്ജ പ്രതിസന്ധിയിലേക്ക് നയിക്കുന്ന റഷ്യ-യുക്രൈന്‍ യുദ്ധത്തിനിടയില്‍ രണ്ട് മന്ത്രിമാരും ആഗോള സാഹചര്യത്തെക്കുറിച്ചും യുഎന്‍ സുരക്ഷാ കൗണ്‍സിലിലെ ഇരു രാജ്യങ്ങളും തമ്മിലുള്ള സഹകരണത്തെക്കുറിച്ചും ചര്‍ച്ച ചെയ്തു. 

ഊര്‍ജം, ആരോഗ്യ സംരക്ഷണം, പ്രതിരോധം, ബഹിരാകാശം, കാലാവസ്ഥാ വ്യതിയാനം, വൈദഗ്ധ്യം, ഫിന്‍-ടെക്, സ്റ്റാര്‍ട്ടപ്പുകള്‍ എന്നിവയുള്‍പ്പെടെയുള്ള സഹകരണത്തിന്റെ മറ്റ് മേഖലകളെക്കുറിച്ചും ഇരുപക്ഷവും ചര്‍ച്ചകള്‍ മുന്നോട്ട് വച്ചിട്ടുണ്ടെന്നും പ്രസ്താവന കൂട്ടിച്ചേര്‍ത്തു. യുഎഇ ഇന്ത്യയുടെ തന്ത്രപ്രധാന പങ്കാളിയാണ്. ഇരുവരും തങ്ങളുടെ ബന്ധങ്ങള്‍ക്ക് വലിയ പ്രാധാന്യം നല്‍കുന്നു. കഴിഞ്ഞ 8 വര്‍ഷത്തിനിടെ പ്രധാനമന്ത്രി നരേന്ദ്ര മോദി നാല് തവണ യുഎഇ സന്ദര്‍ശിച്ചു. കഴിഞ്ഞ മൂന്ന് മാസത്തിനിടെ വിദേശകാര്യ മന്ത്രിമാര്‍ പോലും നാല് തവണ കൂടിക്കാഴ്ച നടത്തി. 2022 ഫെബ്രുവരിയിലാണ് യുഎഇ ഇന്ത്യയുമായി ആദ്യമായി സമഗ്ര സാമ്പത്തിക പങ്കാളിത്ത കരാര്‍ (സിഇപിഎ) ഒപ്പുവച്ചത്.