ചെന്നൈ | പെണ്കുട്ടികളോട് സംസാരിച്ചതിലുള്ള വിരോധത്തില് 12-ാംക്ലാസ് വിദ്യാര്ഥിയെ സഹപാഠികള് മര്ദ്ദിച്ച് കൊലപ്പെടുത്തി. തമിഴ്നാട്ടിലെ ഈറോഡ് ആണ് സംഭവം. ഈറോഡ് സര്ക്കാര് ഹയര് സെക്കന്ഡറി സ്കൂളിലെ വിദ്യാര്ഥിയായ ആദിത്യ(17) ആണ് കൊല്ലപ്പെട്ടത്. ജൂലൈ 2 ബുധനാഴ്ച വൈകുന്നേരം 5.15 ഓടെ സ്കൂള് പരിസരത്ത് നിന്ന് ഏകദേശം 200 മീറ്റര് അകലെയാണ് സംഭവം. ബയോളജി ഗ്രൂപ്പ് വിദ്യാര്ഥിയായ ആദിത്യയെ പന്ത്രണ്ടാം ക്ലാസില് തന്നെ മറ്റു ഗ്രൂപ്പുകളില് പഠിക്കുന്ന രണ്ടു വിദ്യാര്ഥികള് ചേര്ന്നാണ് മര്ദ്ദിച്ച് കൊലപ്പെടുത്തിയത്.
രണ്ട് പ്രതികളുടെ നേതൃത്വത്തിലുള്ള സംഘം ആദിത്യയെ ആക്രമിക്കുകയായിരുന്നു.
സംഭവവുമായി ബന്ധപ്പെട്ട് രണ്ടു വിദ്യാര്ഥികളെ ഈറോഡ് ടൗണ് പോലീസ് അറസ്റ്റ് ചെയ്തു. പ്രതികളുടെ ക്ലാസിലെ പെണ്കുട്ടികളോട് സംസാരിക്കരുതെന്ന് പറഞ്ഞ് ആദിത്യയെ ഭീഷണിപ്പെടുത്തിയതായും പോലീസ് പറഞ്ഞു. പെണ്കുട്ടികളോട് സംസാരിച്ചതിനെ ചൊല്ലി ആദിത്യയും മറ്റു വിദ്യാര്ഥികളും തമ്മില് വാക്കേറ്റമുണ്ടായി. തുടര്ന്ന് രണ്ട് പ്രതികളുടെ നേതൃത്വത്തിലുള്ള സംഘം ആദിത്യയെ ആക്രമിക്കുകയായിരുന്നു.
സംഭവം കണ്ട നാട്ടുകാര് പിതാവിനെ വിവരമറിയിക്കുകയും മര്ദ്ദനത്തില് അബോധാവസ്ഥയിലായ ആദിത്യയെ ഉടന് തന്നെ ഈറോഡ് സര്ക്കാര് ആശുപത്രിയില് എത്തിക്കുകയും ചെയ്തെങ്കിലും ജീവന് രക്ഷിക്കാന് സാധിച്ചില്ല. .
