കോഴിക്കോട്, 2026 ജൂൺ 28 –

കോഴിക്കോട് മാവൂർ പഞ്ചായത്ത് ഓഫീസിൽ ഒളിക്യാമറ കണ്ടെത്തിയതിനെ തുടർന്ന് വിവാദം. പഞ്ചായത്തിലെ താത്കാലിക ജീവനക്കാരനായ ടെക്നിക്കൽ അസിസ്റ്റന്റാണ് ക്യാമറ സ്ഥാപിച്ചതെന്നാണ് ആരോപണം. വനിതാ ജീവനക്കാരാണ് ഓഫീസിൽ ക്യാമറ കണ്ടെത്തിയത്. ഓഫീസിലെ ദൃശ്യങ്ങൾ രണ്ട് വർഷമായി ജീവനക്കാരന്റെ മൊബൈൽ ഫോണിലുണ്ടെന്ന വിവരവും പുറത്തുവന്നിട്ടുണ്ട്.

വിവാദമായതിനെ തുടർന്ന് ക്യാമറ അഴിച്ചുമാറ്റി. സംഭവത്തിൽ എൽ.ഡി.എഫ് അംഗങ്ങൾ പോലീസിൽ പരാതി നൽകി. താത്കാലിക ജീവനക്കാരനെ സർവീസിൽ നിന്ന് പുറത്താക്കണമെന്നാണ് അവരുടെ ആവശ്യം. സംഭവത്തിൽ പോലീസ് അന്വേഷണം ആവശ്യപ്പെട്ടിട്ടുമുണ്ട്.

ഓഫീസിൽ കൂടുതൽ ഒളിക്യാമറകൾ സ്ഥാപിച്ചിട്ടുണ്ടോയെന്ന സംശയവും എൽ.ഡി.എഫ് അംഗങ്ങൾ ഉന്നയിക്കുന്നു. പരാതിയുടെ അടിസ്ഥാനത്തിൽ സംഭവത്തിൽ തുടർനടപടികൾ സ്വീകരിക്കണമെന്ന ആവശ്യവും ശക്തമായിട്ടുണ്ട്.