തൃശ്ശൂർ, 2026 ജൂൺ 28 –
തൃശ്ശൂരിലും തിരുവനന്തപുരത്തും നവജാത ശിശുക്കൾ മരിച്ച സംഭവങ്ങൾ റിപ്പോർട്ട് ചെയ്തു. തൃശ്ശൂരിൽ 18 ദിവസം മാത്രം പ്രായമുള്ള കുഞ്ഞിനെയും തിരുവനന്തപുരത്തെ നെടുമങ്ങാട്ട് 22 ദിവസം പ്രായമുള്ള കുഞ്ഞിനെയുമാണ് മരിച്ച നിലയിൽ കണ്ടെത്തിയത്. രണ്ട് സംഭവങ്ങളിലും മരണകാരണം സംബന്ധിച്ച് കൂടുതൽ പരിശോധനകൾ നടക്കുകയാണ്.
തൃശ്ശൂർ വെള്ളറക്കാട് തറമേൽഞാലിൽ സുധീഷ്, മനുരാധ ദമ്പതികളുടെ 18 ദിവസം പ്രായമുള്ള മകളെയാണ് ഇന്ന് പുലർച്ചെ നാല് മണിയോടെ തൊട്ടിലിൽ മരിച്ച നിലയിൽ കണ്ടെത്തിയത്. പാൽ തൊണ്ടയിൽ കുരുങ്ങിയതാകാം മരണകാരണമെന്നാണ് പ്രാഥമിക നിഗമനം. ഇക്കഴിഞ്ഞ വെള്ളിയാഴ്ച വാഹനാപകടത്തിൽ കുഞ്ഞിന്റെ പിതാവ് സുധീഷ് മരിച്ചിരുന്നു.
തിരുവനന്തപുരം നെടുമങ്ങാട്ട് പറണ്ടോട് സ്വദേശിനി ബിന്ദുവിന്റെ 22 ദിവസം പ്രായമുള്ള മകൾ ശ്രേയയാണ് മരിച്ചത്. രാവിലെ വീട്ടിൽ നിന്ന് ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. പ്രായം തികയാതെയാണ് കുഞ്ഞ് ജനിച്ചത്. ആശുപത്രിയിലെത്തിക്കുമ്പോൾ കുഞ്ഞിന്റെ ശരീരത്തിന് മഞ്ഞനിറമായിരുന്നുവെന്നാണ് വിവരം. മരണകാരണം വ്യക്തമല്ല. മൃതദേഹം നെടുമങ്ങാട് ജില്ലാ ആശുപത്രിയിൽ സൂക്ഷിച്ചിരിക്കുകയാണ്.
