പോർട്ട് വിക്ടോറിയ, 2026 ജൂൺ 28 –
ഇന്ത്യൻ നാവികസേനയുടെ തദ്ദേശീയമായി നിർമ്മിച്ച സർവേ കപ്പലായ ഐ.എൻ.എസ്. ഇക്ഷക്, തെക്കുപടിഞ്ഞാറൻ ഇന്ത്യൻ മഹാസമുദ്ര മേഖലയിലെ പ്രവർത്തന വിന്യാസത്തിന്റെ ഭാഗമായി ജൂൺ 26-ന് സീഷെൽസിലെ പോർട്ട് വിക്ടോറിയയിൽ എത്തി. സീഷെൽസിന്റെ അൻപതാമത് ദേശീയദിനാഘോഷത്തോടൊപ്പമാണ് ഈ സന്ദർശനം നടക്കുന്നത്. ഇന്ത്യയും സീഷെൽസും തമ്മിലുള്ള ദീർഘകാല സമുദ്ര സൗഹൃദത്തിനും സഹകരണത്തിനും ഇത് കൂടുതൽ കരുത്തേകുകയാണ്.
സന്ദർശനത്തിനിടെ ദേശീയദിനാഘോഷങ്ങളിൽ കപ്പൽ പങ്കെടുക്കും. സീഷെൽസ് പ്രതിരോധ സേനയുമായി സമുദ്ര സഹകരണവും പരസ്പര പ്രവർത്തനശേഷിയും വർധിപ്പിക്കാൻ വിവിധ പ്രൊഫഷണൽ കൂടിക്കാഴ്ചകളും നടക്കും. കൂടാതെ മെഡിക്കൽ ക്യാമ്പുകളും അവശ്യസാധനങ്ങളുടെ വിതരണവും ഉൾപ്പെടെയുള്ള ജനസേവന പ്രവർത്തനങ്ങളും സംഘടിപ്പിക്കും. ഇതിലൂടെ ഇരു രാജ്യങ്ങളിലെയും ജനങ്ങൾ തമ്മിലുള്ള ബന്ധവും കൂടുതൽ ശക്തമാക്കാനാണ് ലക്ഷ്യം.
സന്ദർശനത്തിന്റെ ഭാഗമായി പൊതുജനങ്ങൾക്കായി ഐ.എൻ.എസ്. ഇക്ഷക് തുറന്നുകൊടുക്കും. ഇന്ത്യൻ നാവികസേനയുടെ ശേഷിയും പ്രാദേശിക സമുദ്ര സുരക്ഷയ്ക്കും സഹകരണത്തിനുമുള്ള പ്രതിബദ്ധതയും നേരിട്ട് മനസ്സിലാക്കാൻ ഇത് അവസരമൊരുക്കും. സൗഹൃദ രാഷ്ട്രങ്ങളുമായുള്ള സമുദ്ര പങ്കാളിത്തം കൂടുതൽ ശക്തിപ്പെടുത്താനും ഇന്ത്യൻ മഹാസമുദ്ര മേഖലയിലെ സമാധാനവും സുരക്ഷയും സ്ഥിരതയും മുന്നോട്ടുകൊണ്ടുപോകാനുമുള്ള ഇന്ത്യയുടെ പ്രതിബദ്ധതയാണ് ഈ വിന്യാസം വീണ്ടും വ്യക്തമാക്കുന്നത്.
