ന്യൂഡൽഹി, 2026 ജൂൺ 28

ഡോക്ടർമാരുടെ ദിനത്തിന് മുന്നോടിയായി നടന്ന പ്രത്യേക സമ്മേളനത്തിൽ കേന്ദ്രമന്ത്രി ജിതേന്ദ്ര സിങ് ഇന്ത്യയിലെ ആരോഗ്യരംഗത്തിന്റെ ഭാവിയെക്കുറിച്ച് വിശദീകരിച്ചു. വ്യക്തിയുടെ ജനിതകഘടന, ജീവിതശൈലി, പരിസ്ഥിതി എന്നിവ അടിസ്ഥാനമാക്കിയുള്ള വ്യക്തിഗത ചികിത്സാരീതി രാജ്യത്ത് കൂടുതൽ ശക്തമാകുമെന്ന് അദ്ദേഹം പറഞ്ഞു. ജീൻ ചികിത്സ, ആണവ ചികിത്സ തുടങ്ങിയ സാങ്കേതികവിദ്യകളിലൂടെ ആഗോള ആരോഗ്യപ്രശ്നങ്ങൾക്ക് ഇന്ത്യ തദ്ദേശീയ പരിഹാരങ്ങൾ വികസിപ്പിച്ചുവരികയാണെന്നും വ്യക്തമാക്കി.

ഇന്ത്യയുടെ ജനിതക വൈവിധ്യവും ശാസ്ത്ര ഗവേഷണ ശേഷിയും രാജ്യത്തിന് വലിയ സാധ്യതകളാണെന്ന് മന്ത്രി പറഞ്ഞു. പതിനായിരത്തിലധികം പേരുടെ ജനിതക വിവരശേഖരണം ജീനോം ഇന്ത്യ ദൗത്യത്തിന്റെ ഭാഗമായി പൂർത്തിയായതായും അദ്ദേഹം അറിയിച്ചു. രക്തസ്രാവരോഗത്തിന് ജീൻ ചികിത്സയിൽ ഇന്ത്യൻ ഗവേഷകർ നേട്ടമുണ്ടാക്കിയതായും, കൃത്രിമ ബുദ്ധി, ആണവ ചികിത്സ, ടെലിമെഡിസിൻ എന്നിവ രോഗനിർണയവും ചികിത്സയും കൂടുതൽ കൃത്യമാക്കുന്നതിൽ പ്രധാന പങ്കുവഹിക്കുകയാണെന്നും അദ്ദേഹം പറഞ്ഞു. സർക്കാർ സ്ഥാപനങ്ങൾ, വിദ്യാഭ്യാസ സ്ഥാപനങ്ങൾ, സ്വകാര്യ മേഖല എന്നിവയുടെ സഹകരണം കൂടുതൽ ഗവേഷണത്തിന് വഴിയൊരുക്കുന്നതായും അദ്ദേഹം കൂട്ടിച്ചേർത്തു.

രാജ്യത്ത് പുതിയ മരുന്നുകളുടെ ഗവേഷണവും ജൈവസാങ്കേതിക രംഗത്തെ മുന്നേറ്റവും ശക്തിപ്പെടുകയാണെന്ന് മന്ത്രി പറഞ്ഞു. പൊതുജനാരോഗ്യ സംരക്ഷണ പദ്ധതികളും മെഡിക്കൽ കോളേജുകളുടെ വികസനവും ഡിജിറ്റൽ ആരോഗ്യസൗകര്യങ്ങളും ആരോഗ്യരംഗത്തെ കൂടുതൽ ശക്തമാക്കുന്നുവെന്നും അദ്ദേഹം വ്യക്തമാക്കി. പ്രമേഹം, കാൻസർ, കൊഴുപ്പുകരൾ രോഗം തുടങ്ങിയ പകർച്ചയില്ലാത്ത രോഗങ്ങൾ നേരത്തേ കണ്ടെത്തുകയും ബോധവൽക്കരണം വർധിപ്പിക്കുകയും ചെയ്യുന്നത് ദേശീയ മുൻഗണനയാകണമെന്നും അദ്ദേഹം പറഞ്ഞു. ശാസ്ത്രഗവേഷണത്തിലും നവീകരണത്തിലും തുടർച്ചയായ നിക്ഷേപം ഇന്ത്യയെ അടുത്ത തലമുറ ആരോഗ്യരംഗത്തെ ആഗോള നേതാവാക്കുമെന്ന ആത്മവിശ്വാസവും അദ്ദേഹം പ്രകടിപ്പിച്ചു.