ന്യൂഡൽഹി / 2026 / ഒക്ടോബർ 19
ഇന്റർനാഷണൽ കമ്മിറ്റി ഓഫ് ലീഗൽ മെട്രോളജിയുടെ അറുപത്തിയൊന്നാമത് യോഗത്തിന് ഇന്ത്യ ആദ്യമായി ആതിഥേയത്വം വഹിക്കുന്നു. ഒക്ടോബർ 26 മുതൽ 28 വരെ ന്യൂഡൽഹിയിലാണ് യോഗം. അന്താരാഷ്ട്ര ലീഗൽ മെട്രോളജി സംഘടനയുമായി ചേർന്ന് കേന്ദ്ര ഉപഭോക്തൃകാര്യ വകുപ്പാണ് പരിപാടി സംഘടിപ്പിക്കുന്നത്. വിവിധ രാജ്യങ്ങളിൽനിന്നുള്ള നൂറിലധികം പ്രതിനിധികളും നിയമാനുസൃത അളവുതൂക്ക സംവിധാനങ്ങളിലെ വിദഗ്ധരും പങ്കെടുക്കുമെന്നാണ് പ്രതീക്ഷിക്കുന്നത്. അളവുകളിലെ കൃത്യത, നീതിപൂർവമായ വ്യാപാരം, ഉപഭോക്തൃസംരക്ഷണം എന്നിവ ശക്തിപ്പെടുത്താനുള്ള ചർച്ചകളാണ് നടക്കുക.
പുതിയ സാങ്കേതികവിദ്യകളും ഡിജിറ്റൽ സേവനങ്ങളും ചർച്ചയിൽ
ഒക്ടോബർ 26ന് ‘ലീഗൽ മെട്രോളജിയിലെ പരിണാമങ്ങൾ’ എന്ന വിഷയത്തിൽ അന്താരാഷ്ട്ര സെമിനാർ നടക്കും. അളവുതൂക്ക സംവിധാനങ്ങൾ ആധുനികമാക്കുന്നതിലെ അനുഭവങ്ങളും മികച്ച പ്രവർത്തനരീതികളും വിവിധ രാജ്യങ്ങളിലെ വിദഗ്ധർ പങ്കുവെക്കും. നിയന്ത്രണ സേവനങ്ങൾ ഡിജിറ്റലാക്കൽ, അളവുപകരണങ്ങളുടെ മാനദണ്ഡങ്ങൾ അന്താരാഷ്ട്രതലത്തിൽ ഏകീകരിക്കൽ, അവയ്ക്ക് അംഗീകാരം നൽകൽ, ഇലക്ട്രോണിക് പഠനോപകരണങ്ങൾ, ഭരണനിർവഹണത്തിലെ പുതിയ സമീപനങ്ങൾ എന്നിവ ചർച്ചയാകും.
ഒക്ടോബർ 27ന് അന്താരാഷ്ട്ര ലീഗൽ മെട്രോളജി സംഘടനയുടെ തന്ത്രപരമായ ശിൽപ്പശാലയും നടക്കും. സംഘടനയുടെ ഭാവിദിശയും മുൻഗണനകളും സംബന്ധിച്ച് രാജ്യപ്രതിനിധികളും വിദഗ്ധരും അഭിപ്രായങ്ങൾ പങ്കുവെക്കും. പുതിയ വെല്ലുവിളികൾ, സാങ്കേതിക മുന്നേറ്റങ്ങൾ, ഡിജിറ്റൽ പരിവർത്തനം, അന്താരാഷ്ട്ര സഹകരണം, ലോകത്തെ അളവുതൂക്ക സംവിധാനങ്ങളുടെ മാറുന്ന ആവശ്യങ്ങൾ എന്നിവയും പരിഗണിക്കും.
അളവുമാനദണ്ഡങ്ങളും സർട്ടിഫിക്കേഷനും പ്രധാന വിഷയങ്ങൾ
മൂന്നുദിവസത്തെ പരിപാടിയിൽ അന്താരാഷ്ട്ര ശുപാർശകൾ തയ്യാറാക്കുന്നതും പരിഷ്കരിക്കുന്നതും സംബന്ധിച്ച് കമ്മിറ്റി അംഗങ്ങൾ ചർച്ച ചെയ്യും. സംഘടനയുടെ സാങ്കേതിക പ്രവർത്തനങ്ങൾ, സർട്ടിഫിക്കേഷൻ സംവിധാനം, ഡിജിറ്റൽ പരിവർത്തനം, ശേഷിവികസനം, അന്താരാഷ്ട്ര സഹകരണം എന്നിവയും പ്രധാന വിഷയങ്ങളാണ്. രാജ്യങ്ങൾ തമ്മിൽ സാങ്കേതിക അറിവും അനുഭവങ്ങളും കൈമാറാൻ യോഗം സഹായിക്കും. അളവെടുപ്പ് സംവിധാനങ്ങൾ ശക്തിപ്പെടുത്താനും അന്താരാഷ്ട്ര അംഗീകാരമുള്ള മാനദണ്ഡങ്ങൾ പ്രോത്സാഹിപ്പിക്കാനുമാണ് ശ്രമം.
കമ്മിറ്റിയുടെ അറുപതാമത് യോഗം 2025 ഒക്ടോബർ 13നും 15നും ഫ്രാൻസിലെ പാരീസിലാണ് നടന്നത്. അമ്പത്തിയഞ്ച് അംഗരാജ്യങ്ങൾ നേരിട്ടോ പ്രതിനിധികൾ മുഖേനയോ പങ്കെടുത്തു. പന്ത്രണ്ട് അനുബന്ധ അംഗങ്ങളുടെയും സഹകരിച്ചു പ്രവർത്തിക്കുന്ന അഞ്ച് സംഘടനകളുടെയും പ്രതിനിധികളുമുണ്ടായിരുന്നു. സ്വയമേവ പ്രവർത്തിക്കുന്ന അപവർത്തനാങ്കമാപിനികൾ, തൂക്കക്കട്ടികൾ, വാഹനവേഗം അളക്കുന്ന ഉപകരണങ്ങൾ എന്നിവയുമായി ബന്ധപ്പെട്ട സാങ്കേതിക പ്രസിദ്ധീകരണങ്ങൾക്ക് യോഗം അംഗീകാരം നൽകി. സർട്ടിഫിക്കേഷൻ സംവിധാനത്തിന്റെ ചട്ടക്കൂട്, ഡിജിറ്റൽവൽക്കരണം, അന്താരാഷ്ട്ര സഹകരണം എന്നിവയും അന്ന് ചർച്ച ചെയ്തു.
ഇന്ത്യയുടെ പരിഷ്കാരങ്ങൾ ലോകത്തിന് മുന്നിൽ അവതരിപ്പിക്കും
ആദ്യമായി യോഗത്തിന് ആതിഥേയത്വം വഹിക്കുന്നത് ആഗോള അളവുതൂക്ക മേഖലയിലെ ഇന്ത്യയുടെ വർധിച്ചുവരുന്ന പങ്കിന്റെ സുപ്രധാന ഘട്ടമാണ്. അന്താരാഷ്ട്ര സഹകരണം, അളവുമാനദണ്ഡങ്ങളുടെ ഏകീകരണം, നീതിപൂർവമായ വ്യാപാരം, ഉപഭോക്തൃസംരക്ഷണം എന്നിവയിലെ ഇന്ത്യയുടെ ഇടപെടലുകൾക്ക് ഇത് കരുത്തേകും. ഈ മേഖലയിലെ പരിഷ്കാരങ്ങളും മുന്നേറ്റങ്ങളും അന്താരാഷ്ട്ര വേദിയിൽ അവതരിപ്പിക്കാനും അവസരം ലഭിക്കും. നിയന്ത്രണ ചട്ടക്കൂട് ആധുനികമാക്കാനും ചട്ടങ്ങൾ പാലിക്കുന്നതിനുള്ള നടപടികൾ ലളിതമാക്കാനും വിശ്വാസത്തെ അടിസ്ഥാനമാക്കിയ നിയന്ത്രണം പ്രോത്സാഹിപ്പിക്കാനും ഉപഭോക്തൃകാര്യ വകുപ്പ് വിവിധ നടപടികൾ സ്വീകരിച്ചിട്ടുണ്ട്. ശക്തമായ ഉപഭോക്തൃസംരക്ഷണം ഉറപ്പാക്കി വ്യാപാരം എളുപ്പമാക്കുന്നതും ഇതിന്റെ ഭാഗമാണ്.
ഫ്രാൻസ്, ജർമനി, ബ്രിട്ടൻ, ജപ്പാൻ, ചൈന, ഓസ്ട്രേലിയ, സ്വിറ്റ്സർലൻഡ്, അമേരിക്ക, ദക്ഷിണാഫ്രിക്ക, ബ്രസീൽ തുടങ്ങിയ അംഗരാജ്യങ്ങളുടെ പ്രതിനിധികൾ പങ്കെടുക്കുമെന്നാണ് പ്രതീക്ഷിക്കുന്നത്. അനുബന്ധ അംഗരാജ്യങ്ങളുടെയും ബന്ധപ്പെട്ട അന്താരാഷ്ട്ര സംഘടനകളുടെയും പ്രതിനിധികളും എത്തും. വൈവിധ്യമാർന്ന പങ്കാളിത്തം അനുഭവങ്ങളും മികച്ച പ്രവർത്തനരീതികളും പങ്കിടാനും സഹകരണം ശക്തിപ്പെടുത്താനും വഴിയൊരുക്കും. വിശ്വസനീയമായ അളവുകൾ, നീതിപൂർവമായ വ്യാപാരം, സാങ്കേതിക നവീകരണം, ഉപഭോക്തൃവിശ്വാസം എന്നിവയിലെ ചർച്ചകൾ വികസിത ഭാരതം 2047 എന്ന ഇന്ത്യയുടെ കാഴ്ചപ്പാടിനും പിന്തുണ നൽകും.
നിർമാതാക്കൾക്ക് വിപണിസാധ്യത; ഉപഭോക്താക്കൾക്ക് കൃത്യമായ അളവ്
അന്താരാഷ്ട്ര അളവുമാനദണ്ഡങ്ങൾ, ഉൽപ്പന്നങ്ങൾ മാനദണ്ഡങ്ങൾ പാലിക്കുന്നുണ്ടോ എന്ന് വിലയിരുത്താനുള്ള ആവശ്യകതകൾ, സംഘടനയുടെ സർട്ടിഫിക്കേഷൻ സംവിധാനം എന്നിവയെക്കുറിച്ച് ഇന്ത്യൻ നിർമാതാക്കൾക്ക് കൂടുതൽ ധാരണ ലഭിക്കുമെന്നാണ് പ്രതീക്ഷിക്കുന്നത്. ഗുണമേന്മയുള്ള ഉൽപ്പന്നങ്ങൾ വികസിപ്പിക്കാനും അന്താരാഷ്ട്ര വിപണികളിലേക്ക് പ്രവേശിക്കാനും ഇത് സഹായിക്കും. അളവെടുപ്പ് ആവശ്യകതകളിലെ കൂടുതൽ ഏകീകരണം വ്യാപാരത്തിലെ സാങ്കേതിക തടസ്സങ്ങൾ കുറയ്ക്കാനും ബാധകമായ സാഹചര്യങ്ങളിൽ പരിശോധനയും സർട്ടിഫിക്കേഷനും ആവർത്തിക്കേണ്ടിവരുന്നത് ഒഴിവാക്കാനും സഹായിക്കും.
ഉപഭോക്താക്കൾക്ക് ഇടപാടുകളിൽ നീതി ഉറപ്പാക്കാൻ വിശ്വസനീയവും കൃത്യവുമായ അളവുകൾ അനിവാര്യമാണ്. ഉൽപ്പന്നങ്ങളിൽ അളവ് ശരിയായി രേഖപ്പെടുത്താനും സാധനങ്ങളിലും സേവനങ്ങളിലുമുള്ള വിശ്വാസം വർധിപ്പിക്കാനും ഇത് സഹായിക്കും. നിയന്ത്രണ പരിഷ്കാരങ്ങൾ, ഡിജിറ്റൽവൽക്കരണം, വ്യാപാരം എളുപ്പമാക്കൽ എന്നിവയിലെ അനുഭവങ്ങൾ ഇന്ത്യ പങ്കുവെക്കും. ആധുനികവും ഫലപ്രദവുമായ ലീഗൽ മെട്രോളജി സംവിധാനങ്ങളെക്കുറിച്ചുള്ള അന്താരാഷ്ട്ര ചർച്ചകൾക്കും ഇന്ത്യ സംഭാവന നൽകും.
ആഗോള അളവുതൂക്ക സഹകരണത്തിന് കരുത്ത്
ലീഗൽ മെട്രോളജി നടപടികൾ ആഗോളതലത്തിൽ ഏകീകരിക്കാൻ 1955ൽ രൂപീകരിച്ച സർക്കാരുകൾ തമ്മിലുള്ള സംഘടനയാണ് അന്താരാഷ്ട്ര ലീഗൽ മെട്രോളജി സംഘടന. വ്യാപാരം, വ്യവസായം, ആരോഗ്യപരിചരണം, സുരക്ഷ, പരിസ്ഥിതിസംരക്ഷണം എന്നീ മേഖലകളിൽ ഉപയോഗിക്കുന്ന അളവുപകരണങ്ങൾക്കായി സംഘടന അന്താരാഷ്ട്ര ശുപാർശകളും മാനദണ്ഡങ്ങളും അനുബന്ധ രേഖകളും തയ്യാറാക്കുന്നു.
സംഘടനയുടെ സാങ്കേതികവും ഭരണപരവുമായ പ്രവർത്തനങ്ങൾക്ക് ദിശനൽകുന്ന പ്രധാന തീരുമാനസമിതിയാണ് ഇന്റർനാഷണൽ കമ്മിറ്റി ഓഫ് ലീഗൽ മെട്രോളജി. നയവിഷയങ്ങളും സാങ്കേതിക പുരോഗതിയും അന്താരാഷ്ട്ര സഹകരണവും ചർച്ച ചെയ്യാനുള്ള ആഗോള വേദിയാണ് വാർഷിക യോഗം. അറുപത്തിയൊന്നാമത് യോഗത്തിന് ആതിഥേയത്വം വഹിക്കുന്നതിലൂടെ അന്താരാഷ്ട്ര സഹകരണത്തോടും ഏകീകൃത അളവുമാനദണ്ഡങ്ങൾ വികസിപ്പിക്കുന്നതിനോടുമുള്ള പ്രതിബദ്ധത ഇന്ത്യ ശക്തിപ്പെടുത്തുന്നു. ലോകമെങ്ങും നീതിപൂർവമായ വ്യാപാരം, ഉപഭോക്തൃസംരക്ഷണം, അളവെടുപ്പ് സംവിധാനങ്ങളിലുള്ള വിശ്വാസം എന്നിവയ്ക്കും ഇത് പിന്തുണ നൽകും.
