ആന്ധ്രാപ്രദേശം, 2026 ജൂൺ 6 –

ദില്ലി – ചെന്നൈ ഗ്രാൻഡ് ട്രങ്ക് എക്സ്പ്രസിന് നേരെയുണ്ടായ ആക്രമണത്തിൽ സീനിയർ ലോക്കോ പൈലറ്റിന് ഗുരുതര പരിക്കേറ്റു. ആന്ധ്രാപ്രദേശിലെ പ്രകാശം ജില്ലയിലൂടെ ട്രെയിൻ കടന്നുപോകുന്നതിനിടെയാണ് സംഭവം. അജ്ഞാതർ എറിഞ്ഞ കല്ലും മറ്റ് ഭാരമേറിയ വസ്തുക്കളും ട്രെയിനിന്റെ എൻജിൻ വിൻഡ്ഷീൽഡിൽ തട്ടി ചില്ല് തകർന്നു. ഇതേ തുടർന്ന് സീനിയർ ലോക്കോ പൈലറ്റ് എം. ജയറാമിന് ഗുരുതരമായി പരിക്കേറ്റു.

പരിക്കേറ്റ ജയറാമിന്റെ മുറിവിൽ നിന്നൊഴുകിയ രക്തം എൻജിൻ റൂമിൽ പരന്നൊഴുകി തളംകെട്ടി നിന്നിരുന്നു. ഇതിന്റെ ദൃശ്യങ്ങളാണ് സമൂഹമാധ്യമങ്ങളിൽ വ്യാപകമായി പ്രചരിച്ചത്. ഗുരുതര പരിക്കേറ്റിട്ടും യാത്രക്കാരുടെ സുരക്ഷ മുൻനിർത്തി ലോക്കോമോട്ടീവ് ജീവനക്കാർ ട്രെയിൻ മുന്നോട്ട് ഓടിച്ചു. തുടർന്ന് ഉലവപാട് സ്റ്റേഷനിൽ ട്രെയിൻ നിർത്തി അടിയന്തര വൈദ്യസഹായം നൽകി.

ശേഷം എം. ജയറാമിനെ വിദഗ്ധ ചികിത്സയ്ക്കായി വിജയവാഡയിലെ ആശുപത്രിയിലേക്ക് മാറ്റി. അദ്ദേഹത്തിന്റെ ആരോഗ്യനില തൃപ്തികരമാണെന്ന് റെയിൽവേ അധികൃതർ അറിയിച്ചു. ട്രെയിനുകൾക്ക് നേരെയുള്ള ഇത്തരം ആക്രമണങ്ങൾ യാത്രക്കാരുടെയും ജീവനക്കാരുടെയും സുരക്ഷയെ ഗുരുതരമായി ബാധിക്കുന്നതായാണ് വിലയിരുത്തൽ.