തിരുവനന്തപുരം: തിരുവനന്തപുരം കോര്പ്പറേഷന് മേയര് സ്ഥാനത്തേക്ക് മുടവൻമുകളിലെ കൗൺസിലർ ആയ ആര്യ രാജേന്ദ്രനെ നിര്ദ്ദേശിച്ച് സി.പി.ഐ.എം ജില്ലാ സെക്രട്ടേറിയേറ്റ്.
ജമീല ശ്രീധരൻ്റെ പേരായിരുന്നു ആദ്യം ഉയർന്നു കേട്ടിരുന്നത് . എന്നാല് അപ്രതീക്ഷിതമായാണ് ആര്യ രാജേന്ദ്രനെ മേയറാക്കാന് സി.പി.ഐ.എം ജില്ലാ സെക്രട്ടറിയേറ്റ് തീരുമാനിക്കുന്നത്.
നഗരത്തില് പൊതുസമ്മതിയുള്ള വ്യക്തി മേയറായി വരുന്നത് പാര്ട്ടിക്ക് ഗുണം ചെയ്യുമെന്ന കണക്കുകൂട്ടലിലാണ് ആര്യയെ മേയര് സ്ഥാനത്തേക്ക് പാര്ട്ടി പരിഗണിച്ചത്. നേരത്തെ വി.കെ പ്രശാന്തിന്റെ കീഴില് മികച്ച പ്രവര്ത്തനമായിരുന്നു തിരുവനന്തപുരത്ത് നടത്തിയത്. അത്തരമൊരു പ്രവര്ത്തനത്തിന്റെ തുടര്ച്ച കൂടി ആഗ്രഹിച്ചാണ് ആര്യയെ മേയര് സ്ഥാനത്തേക്ക് പരിഗണിച്ചിരിക്കുന്നത്.
21വയസുകാരിയായ ആര്യ രാജേന്ദ്രന് ബാലസംഘം സംസ്ഥാന പ്രസിഡന്റാണ്. ഇതോടെ സംസ്ഥാനത്തെ എറ്റവും പ്രായം കുറഞ്ഞ മേയറെന്ന അപൂര്വ നേട്ടവും ആര്യക്ക് സ്വന്തമാകും.
പാര്ട്ടി ഏല്പ്പിച്ച ദൗത്യം സന്തോഷത്തോടെ ഏറ്റെടുക്കുമെന്നും, പഠനവും രാഷ്ട്രീയ പ്രവര്ത്തനവും ഒരുമിച്ച് കൊണ്ട് പോകാന് സാധിക്കുമെന്നാണ് പ്രതീക്ഷിക്കുന്നതെന്നും ആര്യ പറഞ്ഞു. ഓൾ സെയ്ൻ്റ്സ് കോളജിലെ ബി.എസ്.സി മാത്ത്സ് വിദ്യാര്ത്ഥിനിയാണ് ആര്യ.
