തിരുവനന്തപുരം ഫെബ്രുവരി 12: സംസ്ഥാന പോലീസിന്റെ ആയുധശേഖരത്തില് നിന്ന് വന്തോതില് വെടിക്കോപ്പുകളും ഉണ്ടകളും റൈഫിളുകളും കാണാതായെന്ന് കംപ്ട്രോളര് ആന്റ് ഓഡിറ്റര് ജനറലിന്റെ (സിഎജി) ഓഫീസ്. വെടിക്കോപ്പുകളില് വന് കുറവ് കണ്ടെത്തിയെന്നാണ് സിഎജിയുടെ കണ്ടെത്തല്. 12,061 വെടിയുണ്ടകളുടെ കുറവാണ് കണ്ടെത്തിയിരിക്കുന്നത്. കാണാതായവയ്ക്ക് പകരം വ്യാജ വെടിയുണ്ടകള് വച്ചു. സംഭവം മറച്ചു വയ്ക്കാന് ഉദ്യോഗസ്ഥര് ശ്രമിക്കുകയും ചെയ്തു.
രേഖകള് തിരുത്തി കുറ്റക്കാരെ സംരക്ഷിക്കാനാണ് ബന്ധപ്പെട്ട ഉദ്യോഗസ്ഥര് ശ്രമിച്ചതെന്നും സിഎജി കണ്ടെത്തിയിട്ടുണ്ട്. തിരുവനന്തപുരം എസ്എപിയില് നിന്ന് മാത്രം 25 റൈഫിളുകള് കാണാനില്ല. തൃശ്ശൂര് പോലീസ് അക്കാദമിയിലെയും തിരുവനന്തപുരം എസ്എപി ക്യാമ്പിലെയും ആയുധങ്ങളിലും വെടിക്കോപ്പുകളിലുമാണ് കുറവ് കണ്ടെത്തിയിരിക്കുന്നത്. എല്ലാ പോലീസ് സ്റ്റേഷനിലെയും ആയുധശേഖരം പരിശോധിക്കണമെന്നും സിഎജി ആവശ്യപ്പെടുന്നു. നിയമസഭയില് ഇന്ന് സമര്പ്പിച്ച സിഎജി റിപ്പോര്ട്ടിലാണ് ഈ കണ്ടെത്തലുള്ളത്.
