ബെംഗളൂരു, ജൂലൈ 6:
ബെംഗളൂരുവിലെ ക്യാപ്ജെമിനി ക്യാമ്പസിലുള്ള ഡേകെയർ കേന്ദ്രത്തിൽ കുട്ടികളെ പീഡിപ്പിച്ചെന്ന കേസിൽ അന്വേഷണം ശക്തമാക്കി പൊലീസ്. കുട്ടികളെ മർദിക്കുന്ന ദൃശ്യങ്ങൾ മൊബൈലിൽ പകർത്തി പുറത്തുവിട്ട മുൻ ജീവനക്കാരിയുടെ ലക്ഷ്യം എന്തായിരുന്നുവെന്ന കാര്യവും ഇപ്പോൾ അന്വേഷണ പരിധിയിൽ ഉൾപ്പെടുത്തിയിട്ടുണ്ട്. വീഡിയോ പുറത്തുവിട്ടത് പൊതുതാൽപര്യം മുൻനിർത്തിയാണോ, അതോ സ്ഥാപനത്തോടുള്ള വ്യക്തിപരമായ വൈരാഗ്യം തീർക്കാനാണോ എന്നാണ് പൊലീസ് പ്രധാനമായും പരിശോധിക്കുന്നത്. അതേസമയം, പുറത്തുവന്ന ദൃശ്യങ്ങളുടെ വിശ്വസനീയതയെക്കുറിച്ച് അന്വേഷണസംഘത്തിന് യാതൊരു സംശയവുമില്ല.
പണി പോയതിന് ശേഷമുള്ള വെളിപ്പെടുത്തൽ; എല്ലാ വശങ്ങളും പരിശോധിക്കുന്നു
ഡേകെയറിലെ മുൻ ജീവനക്കാരിയാണ് കുട്ടികളെ ഉപദ്രവിക്കുന്ന ദൃശ്യങ്ങൾ ക്യാമറയിൽ പകർത്തിയതെന്ന് പൊലീസ് കണ്ടെത്തിയിട്ടുണ്ട്. കുട്ടികളോട് ക്രൂരത കാണിക്കുന്ന വിവരം നേരത്തെ തന്നെ അധികൃതരുടെ ശ്രദ്ധയിൽപ്പെടുത്തിയിരുന്നെങ്കിലും നടപടിയൊന്നും ഉണ്ടായില്ലെന്നും, പിന്നീട് തനിക്ക് ജോലി നഷ്ടപ്പെടുകയാണുണ്ടായതെന്നും യുവതി മൊഴി നൽകിയിട്ടുണ്ട്. കേസിൽ മറ്റ് ജീവനക്കാരുടെയും കുട്ടികളുടെ രക്ഷിതാക്കളുടെയും മൊഴികൾ പൊലീസ് രേഖപ്പെടുത്തിവരികയാണ്. ക്രൂരതയുടെ കൂടുതൽ ദൃശ്യങ്ങൾക്കായി സി.സി.ടി.വി ക്യാമറകളും പരിശോധിക്കുന്നുണ്ട്. കേസിൽ രണ്ട് പരിചാരികമാരെ പൊലീസ് ഇതിനകം അറസ്റ്റ് ചെയ്തിട്ടുണ്ട്.
പ്രതിഷേധം ശക്തം; ഡേകെയർ പൂട്ടി
ക്രൂരമായ ദൃശ്യങ്ങൾ സോഷ്യൽ മീഡിയ വഴി പുറത്തുവന്നതോടെയാണ് സംഭവം വലിയ വിവാദമായത്. തുടർന്ന് അഞ്ച് പരിചാരികമാർക്കെതിരെ പൊലീസ് കേസെടുത്തു. നിലവിൽ ക്യാപ്ജെമിനി ബെംഗളൂരു ക്യാമ്പസിലെ ഡേകെയർ കേന്ദ്രം താൽക്കാലികമായി അടപ്പിച്ചിരിക്കുകയാണ്. പോലീസിന് പുറമെ കുട്ടികളുടെ അവകാശ കമ്മീഷനും സംഭവത്തിൽ അടിയന്തര അന്വേഷണം നടത്തുന്നുണ്ട്.
പൊതുവായ നിരാകരണം: ഈ വെബ്സൈറ്റിൽ പ്രസിദ്ധീകരിക്കുന്ന വാർത്തകൾ, ലേഖനങ്ങൾ, അഭിപ്രായങ്ങൾ, ചിത്രങ്ങൾ, വീഡിയോകൾ എന്നിവ പൊതുജനങ്ങൾക്ക് വിവരങ്ങൾ നൽകുന്നതിനുള്ളതാണ്. പ്രസിദ്ധീകരിച്ചിരിക്കുന്ന വിവരങ്ങൾ ലഭ്യമായ ഉറവിടങ്ങളിൽ നിന്ന് ശേഖരിച്ചതും പരമാവധി കൃത്യത ഉറപ്പാക്കാൻ ശ്രമിച്ചതുമാണ്. എന്നിരുന്നാലും, വിവരങ്ങളുടെ സമ്പൂർണ്ണ കൃത്യത, പൂർണ്ണത, കാലികത എന്നിവ സംബന്ധിച്ച് ഞങ്ങൾ യാതൊരു ഉറപ്പും നൽകുന്നില്ല.
