തിരുവനന്തപുരം, 2026 ജൂൺ 24 –
പി എം ശ്രീ പദ്ധതിയുമായി ബന്ധപ്പെട്ട വിഷയത്തിൽ നിയമസഭയിൽ അടിയന്തര പ്രമേയത്തിന് അനുമതി തേടി പ്രതിപക്ഷം. സിപിഐ എം എംഎൽഎ പി പ്രസാദാണ് നോട്ടീസ് നൽകിയത്. ചർച്ചയ്ക്കിടെ വിദ്യാഭ്യാസ മന്ത്രി എൻ ഷംസുദ്ദീൻ പ്രതിപക്ഷത്തിന്റെ ആരോപണങ്ങൾ തള്ളി. പദ്ധതിയുമായി ബന്ധപ്പെട്ട പ്രധാന നടപടികളെല്ലാം മുൻ എൽഡിഎഫ് സർക്കാരാണ് സ്വീകരിച്ചതെന്നും പ്രതിപക്ഷം വസ്തുതകൾക്ക് വിരുദ്ധമായ കാര്യങ്ങളാണ് ഉന്നയിക്കുന്നതെന്നും മന്ത്രി പറഞ്ഞു.
2024 മാർച്ച് 30ന് അന്നത്തെ സെക്രട്ടറി കേന്ദ്രസർക്കാരിന് അയച്ച കത്തിൽ പദ്ധതി റദ്ദാക്കണമെന്ന് ആവശ്യപ്പെട്ടിട്ടില്ലെന്നും പദ്ധതി നടപ്പാക്കാൻ സന്നദ്ധമാണെന്ന നിലപാടാണ് അറിയിച്ചതെന്നും മന്ത്രി വ്യക്തമാക്കി. 2025 ഒക്ടോബർ 16ന് ധാരണാപത്രത്തിൽ ഒപ്പുവെച്ചതും മുൻ സർക്കാരിന്റെ കാലത്താണെന്ന് ചൂണ്ടിക്കാട്ടി. കേരളത്തിന്റെ അവകാശങ്ങൾ ബലികഴിച്ചാണ് അന്നത്തെ സർക്കാർ കരാറിൽ ഒപ്പുവെച്ചതെന്നും അദ്ദേഹം ആരോപിച്ചു.
പദ്ധതിയുമായി ബന്ധപ്പെട്ട ആശങ്കകൾ പഠിക്കാനാണ് മന്ത്രിസഭാ ഉപസമിതി രൂപീകരിച്ചതെന്നും നിലവിലെ സർക്കാർ ഇതുവരെ യാതൊരു തീരുമാനവും എടുത്തിട്ടില്ലെന്നും ഷംസുദ്ദീൻ പറഞ്ഞു. പി എം ശ്രീ പദ്ധതിക്കായി മുൻ സർക്കാർ ശക്തമായി നിലകൊണ്ടിരുന്നുവെന്നും ഇപ്പോഴത്തെ വിവാദം സ്വന്തം ജാള്യത മറയ്ക്കാനുള്ള ശ്രമമാണെന്നും അദ്ദേഹം കുറ്റപ്പെടുത്തി. കേന്ദ്രസർക്കാരിനെതിരായ യുഡിഎഫിന്റെ രാഷ്ട്രീയ നിലപാടിൽ മാറ്റമില്ലെന്നും കോൺഗ്രസും മുസ്ലിം ലീഗും അതിനെതിരെ തുടർന്നും പോരാടുമെന്നും മന്ത്രി വ്യക്തമാക്കി.
