തിരുവനന്തപുരം, 2026 ജൂൺ 17 –
സംസ്ഥാനത്ത് 12 പേർക്ക് കൂടി ഷിഗെല്ല രോഗബാധ സ്ഥിരീകരിച്ചു. ചികിത്സയിലായിരുന്ന ഒരാൾ കൂടി മരിച്ചതോടെ ഈ മാസം മാത്രം ഷിഗെല്ല ബാധിച്ച് മരിച്ചവരുടെ എണ്ണം അഞ്ചായി. മലപ്പുറം പെരിന്തൽമണ്ണ ആലിപ്പറമ്പ് സ്വദേശിയാണ് മരിച്ചത്. അതേസമയം സംസ്ഥാനത്ത് ഡെങ്കിപ്പനി, എലിപ്പനി, മലേറിയ, ഇൻഫ്ലുവൻസ തുടങ്ങിയ രോഗങ്ങളും റിപ്പോർട്ട് ചെയ്യപ്പെടുന്നുണ്ട്. പ്രതിദിന പനിബാധിതരുടെ എണ്ണം 12,191 ആയി ഉയർന്നിട്ടുണ്ട്.
സംസ്ഥാനത്ത് 105 പേർക്ക് കൂടി ഡെങ്കിപ്പനി സ്ഥിരീകരിച്ചു. 19 പേർ എലിപ്പനിക്ക് ചികിത്സ തേടിയിട്ടുണ്ട്. ഇടുക്കി ജില്ലയിൽ ആറു പേർക്ക് മലേറിയ സ്ഥിരീകരിച്ചു. കൂടാതെ 122 പേർക്ക് ഇൻഫ്ലുവൻസ രോഗബാധയും കണ്ടെത്തിയിട്ടുണ്ട്. വിവിധ ജില്ലകളിലായി പകർച്ചവ്യാധികൾ റിപ്പോർട്ട് ചെയ്യപ്പെടുന്നത് ആരോഗ്യവകുപ്പിന്റെ നിരീക്ഷണം ശക്തമാക്കുന്ന സാഹചര്യമാണ് സൃഷ്ടിച്ചിരിക്കുന്നത്.
ഇതിനിടെ കോഴിക്കോട് ജില്ലയിൽ വീണ്ടും മലേറിയ സ്ഥിരീകരിച്ചു. വളയം ടൗൺ ഉൾപ്പെടുന്ന വാർഡ് 14-ൽ താമസിക്കുന്ന ഉത്തർപ്രദേശ് സ്വദേശിയായ ഒരു അതിഥി തൊഴിലാളിക്കാണ് രോഗബാധ കണ്ടെത്തിയത്. കഴിഞ്ഞ ദിവസമാണ് ഇയാൾ നാട്ടിൽ നിന്ന് വളയത്ത് എത്തിയത്. ശക്തമായ പനിയെ തുടർന്ന് വളയം ആശുപത്രിയിൽ ചികിത്സ തേടിയപ്പോഴാണ് പരിശോധനയിൽ മലേറിയ സ്ഥിരീകരിച്ചത്. കോഴിക്കോട് ജില്ലയിൽ നേരത്തെയും അതിഥി തൊഴിലാളികൾ ഉൾപ്പെടെ ചിലർക്ക് മലേറിയ റിപ്പോർട്ട് ചെയ്തിരുന്നു.
