ശബരിമല സ്വര്‍ണക്കൊള്ളക്കേസ്: ആരോപണ വിധേയരുടെ നിയമനത്തിനെതിരെ ദേവസ്വം ബോര്‍ഡിന് മന്ത്രിയുടെ മുന്നറിയിപ്പ്

തിരുവനന്തപുരം, 2026 ജൂണ്‍ 15 –

ശബരിമല സ്വര്‍ണക്കൊള്ളക്കേസില്‍ ആരോപണ വിധേയരായവരെ പ്രധാന സ്ഥാനങ്ങളില്‍ നിയമിച്ചതിനെതിരെ ദേവസ്വം വകുപ്പ് മന്ത്രി കെ മുരളീധരന്‍ രംഗത്തെത്തി. സ്വര്‍ണക്കൊള്ളയില്‍ പങ്കുണ്ടെന്ന് ആരോപിക്കപ്പെടുന്നവരെ മര്‍മ്മസ്ഥാനങ്ങളില്‍ നിയമിക്കുന്ന ഉത്തരവ് നടപ്പാക്കരുതെന്ന് തിരുവിതാംകൂര്‍ ദേവസ്വം ബോര്‍ഡിനോട് ആവശ്യപ്പെട്ടതായി മന്ത്രി അറിയിച്ചു. ഇക്കാര്യം ചൂണ്ടിക്കാട്ടി ദേവസ്വം ബോര്‍ഡ് പ്രസിഡന്റിന് കത്ത് നല്‍കിയതായും അദ്ദേഹം മാധ്യമങ്ങളോട് പറഞ്ഞു.

ദേവസ്വം ബോര്‍ഡ് പ്രസിഡന്റ് ജയകുമാര്‍ നിഷ്പക്ഷനായ വ്യക്തിയായതിനാലാണ് ഇതുവരെ പ്രതികരിക്കാതിരുന്നതെന്ന് മന്ത്രി പറഞ്ഞു. എന്നാല്‍ നിയമന തീരുമാനം തിരുത്തിയില്ലെങ്കില്‍ നിലവിലെ ദേവസ്വം ബോര്‍ഡിനും സ്വര്‍ണക്കൊള്ളയില്‍ പങ്കുണ്ടെന്ന ധാരണയില്‍ സര്‍ക്കാര്‍ മുന്നോട്ട് പോകുമെന്നും അദ്ദേഹം മുന്നറിയിപ്പ് നല്‍കി.

സ്വര്‍ണക്കൊള്ളക്കേസില്‍ പ്രത്യേക അന്വേഷണ സംഘത്തിന്റെ കുറ്റപത്രം സമര്‍പ്പിച്ച ശേഷമേ കൂടുതല്‍ ഇടപെടല്‍ സാധ്യമാകൂവെന്നും മന്ത്രി വ്യക്തമാക്കി. കുറ്റപത്രത്തിലുള്ള കാര്യങ്ങള്‍ തൃപ്തികരമല്ലെങ്കില്‍ സര്‍ക്കാര്‍ തുടര്‍നടപടികള്‍ സ്വീകരിക്കുമെന്നും അദ്ദേഹം പറഞ്ഞു.