സുഗതനെതിരെ രൂക്ഷ വിമര്‍ശനവുമായി വി ശിവന്‍കുട്ടിയും കെ എന്‍ ബാലഗോപാലും

തിരുവനന്തപുരം, 2026 ജൂണ്‍ 15 –

ബിജെപി കൗണ്‍സിലര്‍ സുഗതനെതിരെ മുന്‍ മന്ത്രി വി ശിവന്‍കുട്ടിയും മുന്‍ മന്ത്രി കെ എന്‍ ബാലഗോപാലും രൂക്ഷ വിമര്‍ശനമുന്നയിച്ചു. സുഗതനെ പുറത്താക്കണമെന്ന് ആവശ്യപ്പെട്ട് തിരുവനന്തപുരം കോര്‍പ്പറേഷനിലേക്ക് നടത്തിയ മാര്‍ച്ചിനിടെയായിരുന്നു പ്രതികരണം. തിരുവനന്തപുരം നഗരസഭയുടെ ചരിത്രത്തില്‍ ഇതുപോലൊരു ഗുണ്ടാ തലവന്‍ ഉണ്ടായിട്ടില്ലെന്നും വഴോട്ടുകോണം ജനങ്ങള്‍ക്ക് പറ്റിയ അബദ്ധമാണ് സുഗതനെന്നും വി ശിവന്‍കുട്ടി പറഞ്ഞു.

ബിജെപി കോര്‍പ്പറേഷനില്‍ അധികാരത്തിലെത്തിയതിന് ശേഷം തിരുവനന്തപുരം നാറിയെന്നും കോര്‍പ്പറേഷനുള്ളില്‍ സുഗതന്റെ നേതൃത്വത്തില്‍ ആയുധശേഖരം ഉണ്ടെന്ന് ന്യായമായ സംശയമുണ്ടെന്നും ശിവന്‍കുട്ടി ആരോപിച്ചു. ഇക്കാര്യം അന്വേഷിക്കാന്‍ പൊലീസ് പരിശോധന നടത്തണമെന്നും അദ്ദേഹം ആവശ്യപ്പെട്ടു. മേയറും ഡെപ്യൂട്ടി മേയറും രാവിലെ മുതല്‍ റീല്‍സ് ചെയ്യുന്നതാണ് പ്രധാന ജോലിയെന്നും നഗരസഭയില്‍ റീല്‍സ് ഭരണമാണെന്നും അദ്ദേഹം വിമര്‍ശിച്ചു.

സുഗതനെപ്പോലുള്ള ക്രിമിനല്‍ സ്വഭാവമുള്ള ഒരാള്‍ മുമ്പ് കൗണ്‍സിലറായി ഇരുന്നിട്ടില്ലെന്ന് കെ എന്‍ ബാലഗോപാലും പറഞ്ഞു. സുഗതന്റെ പേരിലുള്ള കേസുകള്‍ രാഷ്ട്രീയ കേസുകളല്ലെന്നും അദ്ദേഹം ആരോപിച്ചു. കേരളത്തെ ഉത്തരേന്ത്യയെ പോലെ മാറ്റാനാണ് ബിജെപി ശ്രമിക്കുന്നതെന്നും അതിന് അനുവദിക്കില്ലെന്നും ബാലഗോപാല്‍ പറഞ്ഞു. കാപ്പ കേസ് പ്രതിക്ക് വേണ്ടി ആര്‍ ശ്രീലേഖ തെരുവില്‍ മുദ്രാവാക്യം വിളിച്ചുവെന്നും മുന്‍ ഡിജിപിയായിരുന്ന വ്യക്തിയാണ് അങ്ങനെ ചെയ്തതെന്നും അദ്ദേഹം വിമര്‍ശിച്ചു.