രാജ്യത്തെ ആദ്യ ഡിജിറ്റല്‍ സെന്‍സസ് രണ്ട് ഘട്ടങ്ങളില്‍; കേരളത്തില്‍ വീടുകളുടെ കണക്കെടുപ്പ് ജൂലൈ ഒന്നുമുതല്‍

തിരുവനന്തപുരം, 2026 ജൂണ്‍ 15 –

രാജ്യത്തെ ആദ്യത്തെ ഡിജിറ്റല്‍ സെന്‍സസ് രണ്ട് ഘട്ടങ്ങളിലായി നടത്തുമെന്ന് പൊതുഭരണ സെക്രട്ടറി കെ ബിജു അറിയിച്ചു. ആദ്യ ഘട്ടത്തില്‍ വീടുകളുടെ പട്ടിക തയ്യാറാക്കലും സെന്‍സസും ഉള്‍പ്പെടും. കേരളത്തില്‍ ജൂലൈ ഒന്ന് മുതല്‍ 30 വരെ വീടുകളുടെ കണക്കെടുപ്പ് നടക്കും. രണ്ടാം ഘട്ടമായ ജനസംഖ്യാ കണക്കെടുപ്പ് 2027 ഫെബ്രുവരിയിലാണ് നടക്കുക.

സെന്‍സസിനായി ആകെ 33 ചോദ്യങ്ങളാണ് വിജ്ഞാപനം ചെയ്തിട്ടുള്ളത്. പൊതുജനങ്ങള്‍ക്ക് സ്വയം വിവരങ്ങള്‍ നല്‍കാന്‍ നാളെ മുതല്‍ 15 ദിവസത്തേക്ക് സെല്‍ഫ് എന്യൂമറേഷന്‍ പോര്‍ട്ടല്‍ വഴി സൗകര്യം ലഭ്യമാകും. പിന്നീട് ഫീല്‍ഡ് സന്ദര്‍ശന സമയത്ത് എന്യൂമറേറ്റര്‍മാര്‍ ഈ വിവരങ്ങള്‍ പരിശോധിച്ച് സ്ഥിരീകരിക്കും. വിവരശേഖരണത്തിനായി അധ്യാപകരും ജീവനക്കാരുമടങ്ങുന്ന 61,282 എന്യൂമറേറ്റര്‍മാരെയും 10,189 സൂപ്പര്‍വൈസര്‍മാരെയും നിയോഗിച്ചിട്ടുണ്ട്. എന്യൂമറേറ്റര്‍മാര്‍ എച്ച്‌എല്‍ഒ ആപ്പ് ഉപയോഗിച്ചാണ് വിവരശേഖരണം നടത്തുക.

സെന്‍സസ് പ്രവര്‍ത്തനങ്ങള്‍ ഏകോപിപ്പിക്കാന്‍ സെന്‍സസ് മാനേജ്മെന്റ് ആന്‍ഡ് മോണിറ്ററിംഗ് സിസ്റ്റം പോര്‍ട്ടലും ഉപയോഗിക്കും. വ്യക്തിഗത വിവരങ്ങള്‍ സുരക്ഷിതമായിരിക്കുമെന്ന് കെ ബിജു വ്യക്തമാക്കി. സെന്‍സസിനായി നിയോഗിക്കപ്പെടുന്ന ജീവനക്കാരുടെ ഷിഫ്റ്റ് സമ്പ്രദായത്തെക്കുറിച്ച് സര്‍ക്കാറുമായി ചര്‍ച്ച നടത്തുമെന്ന് സെന്‍സസ് ഡയറക്ടര്‍ ഡോ. മിത്ര പറഞ്ഞു. കുട്ടികളുടെ പഠനത്തെ ബാധിക്കാത്ത രീതിയിലായിരിക്കും അധ്യാപകരെ വിന്യസിക്കുക. സെന്‍സസുമായി സഹകരിക്കാത്തവര്‍ക്കെതിരെ നിയമനടപടി സ്വീകരിക്കുമെന്നും 1000 രൂപ പിഴയും തടവും ശിക്ഷയായി ലഭിക്കാമെന്നും അദ്ദേഹം അറിയിച്ചു. വിദേശത്തുള്ള ഇന്ത്യക്കാര്‍ ഈ സെന്‍സസിന്റെ ഭാഗമാകില്ലെന്നും വ്യക്തമാക്കി.