.
തിരുവനന്തപുരം: കേന്ദ്രസര്ക്കാര് നടപ്പിലാക്കിയ ജി എസ് ടി നിരക്ക് പരിഷ്കരണം സംസ്ഥാനത്തെ ലോട്ടറി മേഖലയ്ക്ക് വലിയ ആഘാതമാണ് ഉണ്ടാക്കിയതെന്ന് മുഖ്യമന്ത്രി പിണറായി വിജയന്. ഭാഗ്യക്കുറി ടിക്കറ്റിലുള്ള ജിഎസ്ടി 28 ശതമാനത്തില്നിന്ന് 40 ശതമാനമായിട്ടാണ് കേന്ദ്രസര്ക്കാര് ഒറ്റയടിക്ക് വര്ധിപ്പിച്ചത്. മുഖ്യമന്ത്രി എന്ന നിലയില് താനും ധനമന്ത്രിയും നേരിട്ടും കത്തുകള് മുഖേനയും കേന്ദ്ര ധനകാര്യ വകുപ്പിനോടും ജിഎസ്ടി കൗണ്സിലിനോടും ലോട്ടറിയുടെ ജിഎസ്ടി വര്ധിപ്പിക്കരുതെന്ന് നിരവധി തവണ ആവശ്യപ്പെട്ടിട്ടും അതെല്ലാം നിരാകരിക്കുന്ന സമീപനമാണ് കേന്ദ്രസര്ക്കാരിന്റെ ഭാഗത്തുനിന്ന് ഉണ്ടായത്. അതിന്റെ ഭാഗമായാണ് ലോട്ടറി മേഖലയില് നികുതി വര്ധനവിന് കാരണമായതെന്നും അദ്ദേഹം പറഞ്ഞു.
ടിക്കറ്റ് വിലയില് വര്ധന വരുത്തില്ല
എന്നാല്, മറ്റു തൊഴില് ചെയ്യാന് സാധിക്കാത്ത ജീവനോപാധിയായി ലോട്ടറി വ്യാപാരത്തെ ആശ്രയിക്കുന്ന നിരവധി സാധാരണ ജനങ്ങളുടെ തൊഴില് മേഖല എന്ന നിലയില് ഭാഗ്യക്കുറി മേഖലയെ സംരക്ഷിക്കുന്നതിന് സംസ്ഥാന സര്ക്കാര് എല്ലാ കാലത്തും പ്രതിജ്ഞാബദ്ധമാണ്. അതിന്റെ ഭാഗമായി സര്ക്കാരിന്റെ റവന്യൂ വരുമാനത്തില് കുറവ് ഉണ്ടാകുമെങ്കിലും ടിക്കറ്റ് വിലയില് വര്ധന വരുത്താതെ നിലവിലെ ടിക്കറ്റ് നിരക്കുകളില്തന്നെ വില്പ്പന നടത്തുന്നതിനുള്ള എല്ലാ നടപടികളും സര്ക്കാര് സ്വീകരിച്ചതായും മുഖ്യമന്ത്രി പറഞ്ഞു.
