മുൻ രാജ്യസഭാംഗങ്ങൾക്കും ഖത്തർ മുൻ അമീറിനും സഭയുടെ ആദരാഞ്ജലി

ന്യൂഡൽഹി, 2026 ജൂലൈ 20

മുൻ രാജ്യസഭാംഗങ്ങളായ ബൽബീർ കെ. പുഞ്ച്, സ്വപൻ സാധൻ ബോസ്, രംഗസായി രാമകൃഷ്ണ, എച്ച്. ഹനുമന്തപ്പ എന്നിവരുടെയും ഖത്തറിന്റെ ഫാദർ അമീർ ഷെയ്ഖ് ഹമദ് ബിൻ ഖലീഫ അൽതാനിയുടെയും നിര്യാണത്തിൽ രാജ്യസഭ അനുശോചിച്ചു. തിങ്കളാഴ്ച സഭ ചേർന്നപ്പോഴാണ് ചെയർമാൻ അനുശോചന സന്ദേശം വായിച്ചത്. തുടർന്ന് അംഗങ്ങൾ എഴുന്നേറ്റുനിന്ന് മൗനം ആചരിച്ചു.

മാധ്യമരംഗത്ത് വ്യക്തിമുദ്ര പതിപ്പിച്ച ബൽബീർ പുഞ്ച്

ബൽബീർ കെ. പുഞ്ച് ഏപ്രിൽ 18ന് 76-ാം വയസ്സിലാണ് അന്തരിച്ചത്. 2000 മുതൽ 2006 വരെ ഉത്തർപ്രദേശിനെയും 2008 മുതൽ 2014 വരെ ഒഡിഷയെയും പ്രതിനിധീകരിച്ച് രാജ്യസഭാംഗമായിരുന്നു. 1949 ഒക്ടോബർ രണ്ടിന് പഞ്ചാബിലെ ഗുരുദാസ്പുർ ജില്ലയിലെ ലാലോവാലിലാണ് ജനനം. മാധ്യമപ്രവർത്തകൻ, എഴുത്തുകാരൻ, ചിന്തകൻ എന്നീ നിലകളിൽ ശ്രദ്ധേയനായിരുന്നു. ഇന്ത്യയുടെ പൈതൃകം, പൊതുനയം, ദേശീയ വിഷയങ്ങൾ എന്നിവയെക്കുറിച്ച് പുസ്തകങ്ങളും രചിച്ചു. ദേശീയ യുവജന കമ്മിഷൻ അധ്യക്ഷനായും പ്രവർത്തിച്ചു.

ഇന്ത്യൻ ഫുട്ബോളിന്റെ വളർച്ചയ്ക്ക് കരുത്തായ ടുട്ടു ബോസ്

ടുട്ടു ബോസ് എന്നറിയപ്പെട്ടിരുന്ന സ്വപൻ സാധൻ ബോസ് മെയ് 12ന് 78-ാം വയസ്സിലാണ് അന്തരിച്ചത്. 2005 മുതൽ 2011 വരെ പശ്ചിമ ബംഗാളിൽനിന്നുള്ള രാജ്യസഭാംഗമായിരുന്നു. 1948 ജനുവരി 23ന് ഹൗറയിലാണ് ജനിച്ചത്. ഫുട്ബോളിന്റെയും കായിക ഭരണരംഗത്തിന്റെയും വളർച്ചയ്ക്ക് വലിയ സംഭാവന നൽകി. മൂന്ന് പതിറ്റാണ്ടിലധികം മോഹൻ ബഗാൻ അത്‌ലറ്റിക് ക്ലബ്ബുമായി ബന്ധപ്പെട്ട അദ്ദേഹം ക്ലബ് പ്രസിഡന്റായും ഫിഫ ക്ലബ് ദൗത്യസംഘത്തിലെ അംഗമായും പ്രവർത്തിച്ചു.

പൊതുസേവനത്തിൽ ദീർഘകാല സാന്നിധ്യമായ രാമകൃഷ്ണ

രംഗസായി രാമകൃഷ്ണ ജൂൺ നാലിന് 92-ാം വയസ്സിലാണ് അന്തരിച്ചത്. 2012 മുതൽ 2018 വരെ കർണാടകയെ പ്രതിനിധീകരിച്ച് രാജ്യസഭാംഗമായിരുന്നു. 1934 മാർച്ച് 15ന് തമിഴ്നാട്ടിലെ കടലൂർ ജില്ലയിലെ ചിദംബരത്താണ് ജനിച്ചത്. 1957 ബാച്ചിലെ രാജസ്ഥാൻ കേഡർ ഐഎഎസ് ഉദ്യോഗസ്ഥനായിരുന്ന അദ്ദേഹം കേന്ദ്ര-സംസ്ഥാന സർക്കാരുകളിൽ പ്രധാന പദവികൾ വഹിച്ചു. ജനീവയിലെ യൂറോപ്യൻ സാമ്പത്തിക കമ്മിഷനുമായി ബന്ധപ്പെട്ടും ഗാട്ട്, അങ്ക്ടാഡ് സംഘടനകളുടെ ഉപദേഷ്ടാവായും പ്രവർത്തിച്ചു. പിന്നീട് സിന്തറ്റിക് ഫൈബർ വ്യവസായ അസോസിയേഷൻ സെക്രട്ടറി ജനറലായി.

ഗ്രാമവികസനത്തിനായി പ്രവർത്തിച്ച ഹനുമന്തപ്പ

എച്ച്. ഹനുമന്തപ്പ ജൂലൈ 12ന് 94-ാം വയസ്സിലാണ് അന്തരിച്ചത്. 1982 മുതൽ 2000 വരെ തുടർച്ചയായി മൂന്ന് തവണ കർണാടകയിൽനിന്നുള്ള രാജ്യസഭാംഗമായിരുന്നു. 1932 മെയ് 13ന് ചിത്രദുർഗ ജില്ലയിലെ ഗുഡ്ഡദ രംഗവ്വനഹള്ളി ഗ്രാമത്തിലാണ് ജനിച്ചത്. വിദ്യാർഥിയായിരിക്കെ സ്വാതന്ത്ര്യസമരത്തിൽ പങ്കെടുത്ത അദ്ദേഹം അഭിഭാഷകനായും സാമൂഹിക പ്രവർത്തകനായും പ്രവർത്തിച്ചു. ബെംഗളൂരു റെയിൽവേ സർവീസ് കമ്മിഷന്റെയും ദേശീയ പട്ടികജാതി-പട്ടികവർഗ കമ്മിഷന്റെയും അധ്യക്ഷനായിരുന്നു. ഗ്രാമവികസനം, ജലസേചനം, കർഷകക്ഷേമം, ഗ്രാമവ്യവസായം എന്നിവയ്ക്കായി പ്രവർത്തിച്ചു.

ആധുനിക ഖത്തറിന് അടിത്തറയിട്ട മുൻ അമീർ

ഖത്തറിന്റെ ഫാദർ അമീർ ഷെയ്ഖ് ഹമദ് ബിൻ ഖലീഫ അൽതാനി ജൂലൈ 12ന് 74-ാം വയസ്സിലാണ് അന്തരിച്ചത്. 1995 ജൂൺ മുതൽ 2013 ജൂൺ വരെ 18 വർഷം ഖത്തറിന്റെ അമീറായിരുന്നു. ആധുനിക ഖത്തറിന്റെ വളർച്ചയ്ക്കും സമൃദ്ധിക്കും അടിത്തറയിട്ട നേതാവായാണ് സഭ അദ്ദേഹത്തെ അനുസ്മരിച്ചത്. ഇന്ത്യയും ഖത്തറും തമ്മിലുള്ള ബന്ധം ശക്തമാക്കുന്നതിലും അദ്ദേഹം പ്രധാന പങ്കുവഹിച്ചു. കുടുംബത്തിന്റെയും ഖത്തർ സർക്കാരിന്റെയും ജനങ്ങളുടെയും ദുഃഖത്തിൽ രാജ്യസഭ പങ്കുചേർന്നു.