ഉത്തരാഖണ്ഡിൽനിന്ന് ഇറാഖിലേക്ക് ആദ്യമായി ഫ്രഞ്ച് ഫ്രൈസ് കയറ്റുമതി

കാശിപൂർ, 2026 ജൂലൈ 20

ഉത്തരാഖണ്ഡിലെ ഉധം സിങ് നഗർ ജില്ലയിലെ കാശിപൂരിൽനിന്ന് 24 മെട്രിക് ടൺ ശീതീകരിച്ച ഫ്രഞ്ച് ഫ്രൈസ് ആദ്യമായി ഇറാഖിലേക്ക് കയറ്റുമതി ചെയ്തു. കേന്ദ്ര വാണിജ്യ വ്യവസായ മന്ത്രാലയത്തിന് കീഴിലുള്ള കാർഷിക, സംസ്കരിച്ച ഭക്ഷ്യോൽപ്പന്ന കയറ്റുമതി വികസന അതോറിറ്റിയാണ് കയറ്റുമതിക്ക് സഹായം നൽകിയത്. വിരുൻ ഗ്ലോബൽ ട്രേഡ് പ്രൈവറ്റ് ലിമിറ്റഡാണ് ഉൽപ്പന്നങ്ങൾ കയറ്റി അയച്ചത്. ഉത്തരാഖണ്ഡിൽനിന്നുള്ള മൂല്യവർധിത കാർഷിക ഉൽപ്പന്നങ്ങളുടെ കയറ്റുമതി കൂട്ടാനുള്ള ശ്രമങ്ങളുടെ ഭാഗമാണിത്.

കൂടുതൽ വിദേശ ഓർഡറുകൾ പ്രതീക്ഷിച്ച് കമ്പനി

ഉൽപ്പന്നങ്ങളുടെ ഗുണനിലവാരം കൂടുതൽ ഓർഡറുകൾ ലഭിക്കാൻ സഹായിക്കുമെന്നാണ് കയറ്റുമതി കമ്പനിയുടെ പ്രതീക്ഷ. വിദേശ വിപണികളിൽ ദീർഘകാല വ്യാപാരബന്ധം സ്ഥാപിക്കാനും ഇതിലൂടെ കഴിയുമെന്ന് കമ്പനി അറിയിച്ചു. കമ്പനിക്കും പ്രദേശത്തിനും സ്ഥിരമായ കയറ്റുമതി അവസരങ്ങൾ ലഭിക്കുമെന്നാണ് വിലയിരുത്തൽ.

രാജ്യാന്തര വ്യാപാരമേളകളിൽ പങ്കെടുക്കാൻ സഹായം

സിയാൽ, ഗൾഫുഡ്, ഇൻഡസ്ഫുഡ്, വേൾഡ് ഫുഡ് ഇന്ത്യ തുടങ്ങിയ പ്രമുഖ രാജ്യാന്തര വ്യാപാരമേളകളിൽ പങ്കെടുക്കാൻ അതോറിറ്റി കമ്പനിക്ക് സഹായം നൽകിയിരുന്നു. കൂടുതൽ വിദേശ ഉപഭോക്താക്കളെ കണ്ടെത്താനും വിപണികളിലേക്ക് എത്താനും ഈ പങ്കാളിത്തം സഹായിച്ചു.

സംസ്കരിച്ച പച്ചക്കറി കയറ്റുമതിയിൽ മുന്നേറ്റം

2025-26 സാമ്പത്തിക വർഷത്തിൽ ഇന്ത്യ 7,26,874.70 മെട്രിക് ടൺ സംസ്കരിച്ച പച്ചക്കറികൾ കയറ്റുമതി ചെയ്തു. ഇതിന്റെ മൂല്യം 932.25 ദശലക്ഷം ഡോളറായിരുന്നു. മൂല്യവർധിത ഉരുളക്കിഴങ്ങ് ഉൽപ്പന്നങ്ങളുടെ കയറ്റുമതി 2,77,108.51 മെട്രിക് ടണ്ണിലെത്തി. ഇതിന് 289.40 ദശലക്ഷം ഡോളർ മൂല്യമുണ്ടായിരുന്നു. അതോറിറ്റിയുടെ പട്ടികയിലുള്ള മൊത്തം കയറ്റുമതിയിൽ സംസ്കരിച്ച പഴങ്ങളും പച്ചക്കറികളും ചേർന്ന് ഏകദേശം പത്ത് ശതമാനം സംഭാവന ചെയ്തു.

ഗതാഗതച്ചെലവ് കുറയ്ക്കാൻ പുതിയ നയം

കടൽത്തീരമില്ലാത്ത ഉത്തരാഖണ്ഡ് പോലുള്ള സംസ്ഥാനങ്ങളിൽനിന്നുള്ള കയറ്റുമതിയുടെ മത്സരശേഷിയെ ഗതാഗതച്ചെലവ് ബാധിക്കുന്നുണ്ടെന്ന് അതോറിറ്റി ചെയർമാൻ അഭിഷേക് ദേവ് പറഞ്ഞു. സംസ്ഥാന കാർഷിക കയറ്റുമതി നയം രൂപീകരിച്ച് നടപ്പാക്കാൻ ഉത്തരാഖണ്ഡ് സർക്കാരുമായി ചേർന്ന് പ്രവർത്തിക്കുകയാണ്. ഗതാഗത സഹായം നൽകാനുള്ള വ്യവസ്ഥയും നയത്തിൽ ഉൾപ്പെടുത്തും. ഇതിലൂടെ കയറ്റുമതിക്കാർക്ക് കൂടുതൽ വിപണികളിലേക്ക് എത്താൻ കഴിയുമെന്നാണ് പ്രതീക്ഷ.

കർഷകരുടെ വരുമാനം കൂട്ടാൻ ലക്ഷ്യം

ഉത്തരാഖണ്ഡിലെ സംസ്കരിച്ച ഭക്ഷ്യവ്യവസായത്തിന്റെ വളർച്ച ഗുണമേന്മയുള്ള കാർഷിക ഉൽപ്പന്നങ്ങൾക്ക് സ്ഥിരമായ ആവശ്യം സൃഷ്ടിക്കുന്നുണ്ട്. ഉൽപ്പാദന കേന്ദ്രങ്ങളിൽതന്നെ മൂല്യവർധന നടത്താനും കയറ്റുമതി ശൃംഖലയിൽ കൂടുതൽ ആളുകളെ ഉൾപ്പെടുത്താനും ഇത് സഹായിക്കും. വിപണി അവസരങ്ങൾ മെച്ചപ്പെടുത്തി കർഷകരുടെ വരുമാനം കൂട്ടാനും സംസ്ഥാനത്തിന്റെ സംസ്കരിച്ച ഭക്ഷ്യ കയറ്റുമതി വർധിപ്പിക്കാനുമാണ് ലക്ഷ്യം. സംസ്ഥാന സർക്കാരുകൾ, കയറ്റുമതിക്കാർ, കർഷക ഉൽപ്പാദക സംഘടനകൾ, സംസ്കരണ സ്ഥാപനങ്ങൾ എന്നിവരുമായി ചേർന്ന് കയറ്റുമതി അടിസ്ഥാനസൗകര്യങ്ങൾ ശക്തിപ്പെടുത്തുമെന്ന് അതോറിറ്റി അറിയിച്ചു.