ചാരുംമൂട്, 2026 ജൂൺ 26 –

പൂട്ടിക്കിടന്ന പ്രവാസിയുടെ വീട് കുത്തിത്തുറന്ന് കവർച്ച നടത്തിയ കേസിൽ കുപ്രസിദ്ധ മോഷ്ടാവ് അറസ്റ്റിലായി. കൊല്ലം പന്മന സ്വദേശിയായ ‘ചില്ലു ശ്രീകുമാർ’ എന്നറിയപ്പെടുന്ന ശ്രീകുമാർ (41) ആണ് പിടിയിലായത്. നൂറനാടിന് സമീപം കൊട്ടയ്ക്കാട്ടുശേരിയിലെ പ്രവാസിയുടെ വീട്ടിൽ നടന്ന കവർച്ചക്കേസിലാണ് അറസ്റ്റ്.

കൊലപാതകം, അടിപിടി, മോഷണം തുടങ്ങി വിവിധ പൊലീസ് സ്റ്റേഷനുകളിലായി നാൽപതോളം കേസുകളിൽ പ്രതിയാണ് ശ്രീകുമാർ. താമരക്കുളം വേദരപ്ലാവിൽ പത്ത് ദിവസം മുമ്പ് ആളില്ലാത്ത വീട് കുത്തിത്തുറന്ന് മോഷണശ്രമം നടത്തിയ കേസിലും ഇയാൾ പ്രതിയാണെന്ന് പൊലീസ് അറിയിച്ചു. പ്രദേശത്തെ സി.സി.ടി.വി ദൃശ്യങ്ങൾ കേന്ദ്രീകരിച്ച് നടത്തിയ അന്വേഷണത്തിലാണ് പ്രതിയെക്കുറിച്ചുള്ള നിർണായക വിവരം പൊലീസിന് ലഭിച്ചത്.

മാവേലിക്കര കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. കവർച്ചയിൽ ശ്രീകുമാറിനൊപ്പം ഉണ്ടായിരുന്ന കൂട്ടുപ്രതിക്കായി അന്വേഷണം ഊർജിതമാക്കിയതായി നൂറനാട് പൊലീസ് അറിയിച്ചു.