കറുകച്ചാൽ, 2026 ജൂൺ 25 –

കറുകച്ചാൽ മേഖലയിലെ ദീർഘകാല ആവശ്യമായിരുന്ന ഫയർ സ്റ്റേഷൻ യാഥാർഥ്യമാകുന്നു. ബജറ്റിനുള്ള മറുപടി പ്രസംഗത്തിൽ മുഖ്യമന്ത്രി വി. ഡി. സതീശൻ കറുകച്ചാലിൽ ഫയർ സ്റ്റേഷൻ അനുവദിക്കുകയും പ്രാരംഭ നിർമാണ പ്രവർത്തനങ്ങൾക്കായി ഒരു കോടി രൂപ അനുവദിക്കുകയും ചെയ്തു. ഇതോടെ വർഷങ്ങളായുള്ള പ്രദേശവാസികളുടെ ആവശ്യം സഫലമാകുകയാണ്.

കറുകച്ചാൽ, നെടുംകുന്നം, കങ്ങഴ, മണിമല പഞ്ചായത്തുകൾക്കും മല്ലപ്പള്ളി, മാടപ്പള്ളി പഞ്ചായത്തുകളിലെ ജനങ്ങൾക്കും പുതിയ ഫയർ സ്റ്റേഷൻ പ്രയോജനപ്പെടും. നിലവിൽ തീപിടിത്തമോ മറ്റ് അത്യാഹിതങ്ങളോ ഉണ്ടായാൽ പാമ്പാടി, ചങ്ങനാശേരി എന്നിവിടങ്ങളിൽ നിന്നാണ് അഗ്നിരക്ഷാസേന എത്തുന്നത്. ഇതുമൂലം രക്ഷാപ്രവർത്തനത്തിന് കാലതാമസം നേരിടുകയും നാശനഷ്ടങ്ങൾ വർധിക്കുകയും ചെയ്യുന്ന സാഹചര്യമാണുള്ളത്.

ഈ പ്രശ്നത്തിന് പരിഹാരമായാണ് കറുകച്ചാലിൽ ഫയർ സ്റ്റേഷൻ സ്ഥാപിക്കാൻ തീരുമാനമായത്. കാഞ്ഞിരപ്പള്ളി എം.എൽ.എ റോണി കെ. ബേബിയുടെ ഇടപെടലുകളാണ് പദ്ധതിക്ക് വഴിയൊരുക്കിയതെന്ന് അറിയിച്ചു. കറുകച്ചാൽ, ചങ്ങനാശേരി റോഡിൽ പൊലീസ് സ്റ്റേഷന് സമീപമുള്ള സർക്കാർ ഭൂമിയിലാണ് ഫയർ സ്റ്റേഷൻ നിർമിക്കാൻ ഉദ്ദേശിക്കുന്നത്.