തിരുവനന്തപുരം, 2026 ജൂൺ 24 –

ഐഎച്ച്ആർഡി ഫീസ് വർധനവിനെതിരെ എസ്എഫ്‌ഐ നടത്തിയ സെക്രട്ടറിയേറ്റ് മാർച്ച് സംഘർഷത്തിൽ കലാശിച്ചതിന് പിന്നാലെ പൊലീസും എസ്എഫ്‌ഐയും പരസ്പരം ഗുരുതര ആരോപണങ്ങളുമായി രംഗത്തെത്തി. മാർച്ചിനിടെ എസ്എഫ്‌ഐ പ്രവർത്തകർ ബ്ലേഡ് ഉപയോഗിച്ച് ആക്രമിച്ചെന്നാണ് പൊലീസിന്റെ ആരോപണം. എന്നാൽ ബ്ലേഡ് ഉപയോഗിച്ച് ആക്രമിച്ചത് പൊലീസാണെന്നാണ് എസ്എഫ്‌ഐ നേതൃത്വത്തിന്റെ മറുപടി. സംഭവസ്ഥലത്ത് നിന്ന് ലഭിച്ച ബ്ലേഡുകളുടെ ചിത്രങ്ങളും എസ്എഫ്‌ഐ പുറത്തുവിട്ടിട്ടുണ്ട്.

സംഭവത്തിൽ ഇരുപതോളം പ്രവർത്തകർക്ക് പരിക്കേറ്റതായി എസ്എഫ്‌ഐ ആരോപിക്കുന്നു. ബ്ലേഡ് ആക്രമണത്തിൽ പെൺകുട്ടികൾക്കും പരിക്കേറ്റതായി സംഘടന പറയുന്നു. കോവളം ഏരിയ കമ്മിറ്റി അംഗം അശ്വിന്റെ മുതുകിൽ ബ്ലേഡ് ഉപയോഗിച്ച് മുറിവേൽപ്പിച്ചെന്നും വിതുര ഏരിയ ജോയിന്റ് സെക്രട്ടറിക്കും പരിക്കേറ്റെന്നും എസ്എഫ്‌ഐ സംസ്ഥാന സെക്രട്ടറി പി എസ് സഞ്ജീവ് ആരോപിച്ചു. വനിതാ പൊലീസ് ഇല്ലാതെയാണ് വനിതാ പ്രവർത്തകരെ മർദിച്ചതെന്നും അദ്ദേഹം കുറ്റപ്പെടുത്തി.

അതേസമയം, ബ്ലേഡുകൾ കൊണ്ടുവന്നത് ആരാണെന്ന് കണ്ടെത്താൻ സിസിടിവി ദൃശ്യങ്ങൾ ഉൾപ്പെടെ പരിശോധിക്കുമെന്നും കേസെടുക്കുമെന്നും പൊലീസ് അറിയിച്ചു. ഐഎച്ച്ആർഡി ഫീസ് വർധനവിനെതിരെ നടന്ന പ്രതിഷേധം സംഘർഷത്തിലേക്ക് നീങ്ങിയതോടെ പൊലീസ് പലതവണ ജലപീരങ്കി പ്രയോഗിച്ചിരുന്നു. തുടർന്ന് പ്രവർത്തകരും പൊലീസും തമ്മിൽ ഏറ്റുമുട്ടലുണ്ടാവുകയും പൊലീസ് ലാത്തിച്ചാർജു നടത്തുകയും ചെയ്തു. ഫീസ് വർധനവ് പിൻവലിച്ചില്ലെങ്കിൽ സമരം ശക്തമാക്കുമെന്ന് എസ്എഫ്‌ഐ മുന്നറിയിപ്പ് നൽകി.