ന്യൂഡൽഹി, 2026 ജൂൺ 18

ഇന്ത്യയും യുണൈറ്റഡ് കിംഗ്ഡവും തമ്മിലുള്ള സമഗ്ര സാമ്പത്തിക വ്യാപാര കരാറും സാമൂഹിക സുരക്ഷാ സംഭാവനകളുമായി ബന്ധപ്പെട്ട കരാറും 2026 ജൂലൈ പതിനഞ്ച് മുതൽ പ്രാബല്യത്തിൽ വരും. ഇന്ത്യയുടെ ആഗോള സാമ്പത്തിക ഇടപെടലിൽ പുതിയ ഘട്ടത്തിന് തുടക്കമിടുന്ന നടപടിയാണിത്. ഇന്ത്യയിൽ നിന്ന് യുണൈറ്റഡ് കിംഗ്ഡത്തിലേക്കുള്ള കയറ്റുമതിയുടെ ഏകദേശം തൊണ്ണൂറ്റൊൻപത് ശതമാനത്തിനും തീരുവയില്ലാത്ത പ്രവേശനം ലഭിക്കും.

ഇരു രാജ്യങ്ങളും ആവശ്യമായ ആഭ്യന്തര നടപടികളും അംഗീകാര നടപടികളും പൂർത്തിയാക്കിയതോടെയാണ് കരാർ നടപ്പാകുന്നത്. സാമൂഹിക സുരക്ഷാ സംഭാവനകളുമായി ബന്ധപ്പെട്ട കരാറിലൂടെ യുണൈറ്റഡ് കിംഗ്ഡത്തിൽ താൽക്കാലിക നിയമനത്തിൽ പോകുന്ന ഇന്ത്യൻ തൊഴിലാളികൾക്കും തൊഴിലുടമകൾക്കും ഇരട്ട സാമൂഹിക സുരക്ഷാ സംഭാവന നൽകുന്നതിൽ നിന്ന് ഒഴിവ് ലഭിക്കും. ഈ ഒഴിവിന്റെ കാലാവധി മൂന്ന് വർഷത്തിൽ നിന്ന് അഞ്ച് വർഷമാക്കി ഉയർത്തിയിട്ടുണ്ട്. എഴുപത്തയ്യായിരത്തിലധികം ഇന്ത്യൻ പ്രൊഫഷണലുകൾക്കും തൊള്ളായിരത്തിലധികം കമ്പനികൾക്കും ഇതിന്റെ പ്രയോജനം ലഭിക്കുമെന്നാണ് പ്രതീക്ഷ. വിവരസാങ്കേതിക സേവനങ്ങൾ, ധനകാര്യ സേവനങ്ങൾ, വിദ്യാഭ്യാസം, ആരോഗ്യരംഗം, എഞ്ചിനീയറിങ്, ഉപദേശ സേവനങ്ങൾ തുടങ്ങി നൂറ്റിമുപ്പത്തിയേഴു ഉപമേഖലകളിൽ കൂടുതൽ വിപണി പ്രവേശനവും ലഭിക്കും.

രണ്ടായിരത്തി ഇരുപത്തൊന്നിൽ ആരംഭിച്ച വിപുലീകൃത വ്യാപാര പങ്കാളിത്തത്തിലൂടെയാണ് ഈ സഹകരണത്തിന് അടിത്തറ പാകപ്പെട്ടത്. പതിനാലു ഘട്ട ചർച്ചകൾക്ക് ശേഷം കരാർ രണ്ടായിരത്തി ഇരുപത്തഞ്ച് മേയ് ആറിന് പൂർത്തിയായി. പിന്നീട് രണ്ടായിരത്തി ഇരുപത്താറ് ഫെബ്രുവരി പത്തിന് സാമൂഹിക സുരക്ഷാ കരാറും ഒപ്പുവെച്ചു. കാർഷിക ഉൽപ്പന്നങ്ങളിലെയും മറ്റ് അതിസൂക്ഷ്മ മേഖലകളിലെയും ഇന്ത്യയുടെ താൽപര്യങ്ങൾ സംരക്ഷിക്കുന്ന വ്യവസ്ഥകളും കരാറിലുണ്ട്. കർഷകർ, മത്സ്യത്തൊഴിലാളികൾ, തൊഴിലാളികൾ, ചെറുകിട സംരംഭകർ, യുവ സംരംഭകർ, പ്രൊഫഷണലുകൾ എന്നിവർക്കെല്ലാം പുതിയ അവസരങ്ങൾ സൃഷ്ടിക്കുമെന്നാണ് വിലയിരുത്തൽ.

8