ലഖ്നൗ, 2026 മെയ് 30 –
ഗാസിയാബാദിൽ ദേശീയ താരം കൊല്ലപ്പെട്ട നിലയിൽ കണ്ടെത്തി
അന്താരാഷ്ട്ര പാരാ അത്ലറ്റ് ചിരാഗ് ത്യാഗിയെ ഗാസിയാബാദിൽ മരിച്ച നിലയിൽ കണ്ടെത്തി. ശനിയാഴ്ച ഹിൻഡൻ മേഖലയിലെ സായി ഉപവനിൽ നിന്നാണ് മൃതദേഹം കണ്ടെത്തിയത്. ചിരാഗിന്റെ പുറത്ത് വെടിയേറ്റ പാടുണ്ടെന്ന് പൊലീസ് അറിയിച്ചു. വെടിവെച്ചുകൊലപ്പെടുത്തിയതാണെന്നാണ് പൊലീസിന്റെ പ്രാഥമിക നിഗമനം.
ഇന്ത്യയ്ക്കായി നൂറും നാനൂറും മീറ്റർ മത്സരങ്ങളിൽ പങ്കെടുത്ത താരം
ഗാസിയാബാദ് സ്വദേശിയായ ചിരാഗ് ത്യാഗി ഇന്ത്യയ്ക്കായി നൂറ് മീറ്റർ, നാനൂറ് മീറ്റർ സ്പ്രിന്റ് മത്സരങ്ങളിൽ പങ്കെടുത്തിരുന്നു. ദേശീയ-അന്താരാഷ്ട്ര മത്സരങ്ങളിലെ പ്രകടനങ്ങളിലൂടെ ശ്രദ്ധ നേടിയ താരമായിരുന്നു അദ്ദേഹം. ഗാസിയാബാദിലെ മുരാദ്നഗർ പൊലീസ് സ്റ്റേഷൻ പരിധിയിലുള്ള ബസന്ത്പുർ സൈത്ലി ഗ്രാമവാസിയായിരുന്നു ചിരാഗ്. സംഭവത്തെക്കുറിച്ച് കുടുംബത്തെ അറിയിച്ചതായി കോട്വാലി സ്റ്റേഷൻ ഹൗസ് ഓഫീസർ സച്ചിൻ കുമാർ പറഞ്ഞു. ചിരാഗിന്റെ പുറത്ത് വെടിയേറ്റ മുറിവുണ്ടായിരുന്നുവെന്നും അദ്ദേഹം സ്ഥിരീകരിച്ചു.
കൊലപാതക സംശയത്തിൽ അന്വേഷണം തുടരുന്നു
സംഭവത്തിന് പിന്നാലെ പൊലീസ് അന്വേഷണം ശക്തമാക്കിയിട്ടുണ്ട്. ചിരാഗിന്റെ മരണത്തിന് പിന്നിലെ കാരണം എന്താണെന്ന കാര്യത്തിൽ ഇതുവരെ വ്യക്തത വന്നിട്ടില്ല. ദേശീയ തലത്തിൽ ശ്രദ്ധ നേടിയിരുന്ന പാരാ അത്ലറ്റിന്റെ മരണം കായികലോകത്തും ഞെട്ടലുണ്ടാക്കിയിരിക്കുകയാണ്.
