തൃശൂര് | പൂജാരിയുടെ വീട്ടില് എത്തിയ യുവതി 12 പവന് വരുന്ന സ്വര്ണാഭരണങ്ങള് മോഷ്ടിച്ചു. പൂജാരിയായ കൊടകര മറ്റത്തൂര് മൂലംകുടം സ്വദേശി അജേഷ് എന്നയാളുടെ വീട്ടില് പ്രശ്ന പരിഹാരത്തിനായി എത്തിയ പറക്കാട്ടുകര സ്വദേശിനി മണ്ണാംപറമ്പില് വീട്ടില് സൂര്യ (26)യാണ് മോഷണം നടത്തിയത്. യുവതിയെ തൃശൂര് റൂറല് പൊലീസ് അറസ്റ്റ് ചെയ്തു.
പൂജാരി അടുക്കളയിലേക്ക് മാറിയ സമയത്ത് യുവതി തന്ത്രപൂര്വം സ്വര്ണാഭരണങ്ങള് കവരുകയായിരുന്നു.
ഇക്കഴിഞ്ഞ ഫെബ്രുവരി 16ന് ആയിരുന്നു സംഭവം. വീട്ടിലെ ബെഡ്റൂമിലെ അലമാരക്കുള്ളില് ബാഗില് സൂക്ഷിച്ചിരുന്ന പൂജാരിയുടെ ഭാര്യയുടെ 12 പവനോളം തൂക്കം വരുന്നതും ഏകദേശം 12 ലക്ഷത്തിലധികം വില വരുന്നതുമായ സ്വര്ണാഭരണങ്ങളാണ് പ്രതി കവര്ന്നത്. യുവതി പ്രശ്നപരിഹാരത്തിനായി ഇടക്കിടെ പൂജാരിയുടെ വീട്ടില് വരാറുണ്ട്. പൂജാരി അടുക്കളയിലേക്ക് മാറിയ സമയത്ത് യുവതി തന്ത്രപൂര്വം അലമാരയില് നിന്ന് സ്വര്ണാഭരണങ്ങള് കവര്ന്നത് . കൊടകര പൊലീസ് ഇന്സ്പെക്ടര് ജെര്ലിന് വി സ്കറിയയുടെ നേതൃത്വത്തിലുള്ള സംഘമാണ് പ്രതിയെ പിടികൂടിയത്.
