മുംബൈ: സ്റ്റോക്ക് എക്സ്ചേഞ്ചിലെ ക്രമക്കേടുമായി ബന്ധപ്പെട്ട കേസില് നാഷണല് സ്റ്റോക്ക് എക്സ്ചേഞ്ച് മുന് മാനേജിങ് ഡയറക്ടറും മുന് ചീഫ് എക്സിക്യൂട്ടീവ് ഓഫിസറുമായ ചിത്ര രാമകൃഷ്ണ അറസ്റ്റില്.ഇവരുടെ മുന്കൂര് ജാമ്യാപേക്ഷ ഡല്ഹിയിലെ സിബിഐ പ്രത്യേക കോടതി കഴിഞ്ഞ ദിവസം തള്ളിയിരുന്നു. ഇതിന് പിന്നാലെയാണ് സിബിഐ പ്രത്യേക അന്വേഷണ സംഘം ചിത്രയെ അറസ്റ്റ് ചെയ്തത്. 2013 മുതല് 2016 വരെ നാഷണല് സ്റ്റോക്ക് എക്സ്ചേഞ്ച് എംഡി ആയിരുന്നു ചിത്ര. ഈ കാലയളവില് പല തിരിമറികളും നടന്നെന്നാണ് കണ്ടെത്തല്. ചോദ്യം ചെയ്യലില് ഹിമാലയത്തിലെ ഒരു സന്യാസിയുടെ താല്പര്യപ്രകാരമാണ് താന് പല കാര്യങ്ങളും ചെയ്തതെന്നായിരുന്നു ചിത്രയുടെ മറുപടി. എന്നാല് ഇയാള് ആരെന്ന് കണ്ടെത്താനായിട്ടില്ല. ഇയാളുമായുള്ള ചിത്രയുടെ ആശയവിനിമയം അടിമുടി ദുരൂഹമെന്നാണ് സെബിയുടെ റിപ്പോര്ട്ടില് പറയുന്നത്. ഇതുമായി ബന്ധപ്പെട്ട അന്വേഷണങ്ങളാണ് ചിത്രയുടെ അറസ്റ്റിലേക്കെത്തിയത്.
എന്എസ്ഇ എംഡിയായിരുന്ന കാലത്ത് ഓഹരി വിപണിയുമായി ബന്ധപ്പെട്ട സുപ്രധാന വിവരങ്ങളാണ് അജ്ഞാതന് കൈമാറിയതെന്നാണ് റിപ്പോര്ട്ട്. നേരത്തെ ക്രമക്കേടുകളുടെ പേരില് ചിത്രയ്ക്ക് സെബി 3 കോടി രൂപ പിഴ ചുമത്തിയിരുന്നു. ഇതിനു പിന്നാലെ സിബിഐ ചോദ്യം ചെയ്തു. ആദായനികുതി വകുപ്പ് ഇവരുമായി ബന്ധപ്പെട്ട കേന്ദ്രങ്ങളില് റെയ്ഡും നടത്തിയിരുന്നു.
