കോഴിക്കോട്: ഹൈദരലി ശിഹാബ് തങ്ങളുടെ മകനും യൂത്ത് ലീഗ് ദേശീയ വൈസ് പ്രസിഡന്റുമായ പാണക്കാട് മോയിന് അലി ശിഹാബ് തങ്ങള് കോഴിക്കോട് നടത്തിയ വാര്ത്താ സമ്മേളനത്തിനിടെ നാടകീയ സംഭവങ്ങള്. 05/08/21 വ്യാഴാഴ്ച വൈകിട്ട് നടന്ന വാര്ത്താ സമ്മേളനത്തിനിടയിലാണ് മുസ്ലിം ലീഗ് പ്രവര്ത്തകനായ റാഫി പുതിയകടവ് മോയിന് അലി തങ്ങള്ക്ക് നേരെ ഭീഷണി മുഴക്കുകയും തെറിവിളിക്കുകയും ചെയ്തത്.
തുടര്ന്ന് ഒരു വിഭാഗം പ്രവര്ത്തകര് മോയിന് അലിയെ സുരക്ഷിത സ്ഥലത്തേക്ക് മാറ്റുകയായിരുന്നു. മുസ്ലിം ലീഗിന്റെ അഭിഭാഷക സംഘടനയായ കേരളാ ലോയേഴ്സ് ഫോറം സംസ്ഥാന പ്രസിഡന്റ് മുഹമ്മഷാ ആയിരുന്നു കോഴിക്കോട് ലീഗ് ഹൗസില് വാര്ത്താസമ്മേളനം വിളിച്ചുചേര്ത്തിരുന്നത്.
വാര്ത്താസമ്മേളനത്തിന്റെ ആദ്യ ഘട്ടത്തില് മുഹമ്മദ് ഷാ ആയിരുന്നു സംസാരിച്ചിരുന്നത്. നിലവിലെ ആരോപണങ്ങള്ക്ക് ലീഗിന്റെ വിശദീകരണം എന്ന നിലക്കാണ് അദ്ദേഹം സംസാരിച്ചത്. തുടര്ന്നായിരുന്നു മോയിന് അലി തങ്ങള് സംസാരിച്ചത്. ഇതിനിടെയായിരുന്നു റാഫി പുതിയകടവ് എന്ന പ്രവര്ത്തകന് വാര്ത്താസമ്മേളനം തടസ്സപ്പെടുത്തിയത്.
വാര്ത്താസമ്മേളനത്തില് കുഞ്ഞാലിക്കുട്ടിക്കെതിരെ രൂക്ഷ വിമര്ശനമാണ് മോയിന് അലി ഉന്നയിച്ചത്. ഫണ്ട് കൈകാര്യം ചെയ്തത് കുഞ്ഞാലിക്കുട്ടി ആയിരുന്നിട്ടും ചന്ദ്രികയുടെ പ്രതിസന്ധിയില് അദ്ദേഹം ഇടപെട്ടില്ലെന്ന് മോയിന് അലി പറഞ്ഞു.
നാല് പതിറ്റാണ്ടായി ഫണ്ട് കൈകാര്യം ചെയ്തത് കുഞ്ഞാലിക്കുട്ടിയായിരുന്നു. ഫിനാന്സ് മാനേജര് സമീറിനെവെച്ചത് കുഞ്ഞാലിക്കുട്ടിയാണ്. പാര്ട്ടി ഒരു വ്യക്തിയിലേക്ക് ചുരുങ്ങിയെന്നും അദ്ദേഹം കുറ്റപ്പെടുത്തി. ലീഗിന്റെ ധനകാര്യ മാനേജ്മെന്റ് ആകെ പാളിയെന്ന് അദ്ദേഹം പറഞ്ഞു.
‘പാണക്കാട് കുടുംബത്തിന്റെ ചരിത്രത്തില് ഇങ്ങനെ ഒരു സംഭവം ഉണ്ടായിട്ടില്ല. ഹൈദരലി തങ്ങള് കടുത്ത മാനസിക സമ്മര്ദ്ദത്തിലാണ് കഴിയുന്നത്,’ മോയിന് അലി പറഞ്ഞു.
അതേസമയം, പാണക്കാട് ഹൈദരലി ശിഹാബ് തങ്ങള്ക്ക് വീണ്ടും എന്ഫോഴ്സ്മെന്റ് നോട്ടീസ് നല്കിയിരുന്നു. ചന്ദ്രിക ദിനപത്രത്തിന്റെ അക്കൗണ്ടുമായി ബന്ധപ്പെട്ട കേസിലാണ് മൊഴിയെടുക്കാന് നോട്ടീസ് അയച്ചിരിക്കുന്നത്.
