ന്യൂഡൽഹി / 2026 / നവംബർ 17
ഇന്ത്യൻ കൗൺസിൽ ഓഫ് മെഡിക്കൽ റിസർച്ചിന് കീഴിലുള്ള ദേശീയ മലേറിയ ഗവേഷണ സ്ഥാപനത്തിന്റെ ഒരുവർഷം നീളുന്ന സുവർണജൂബിലി ആഘോഷങ്ങൾ രാഷ്ട്രപതി ദ്രൗപദി മുർമു ഉദ്ഘാടനം ചെയ്തു. നവംബർ 17ന് ന്യൂഡൽഹിയിലായിരുന്നു ചടങ്ങ്. ഗവേഷണം, സഹകരണം, നൂതന ആശയങ്ങൾ എന്നിവയിലൂടെ വികസിത ഭാരതത്തിന്റെ ആരോഗ്യലക്ഷ്യങ്ങൾ കൈവരിക്കാൻ ഐസിഎംആർ പോലുള്ള പ്രമുഖ സ്ഥാപനങ്ങൾക്ക് നേതൃത്വം നൽകാനാകുമെന്ന് രാഷ്ട്രപതി പറഞ്ഞു. മലേറിയക്കെതിരായ പോരാട്ടത്തിൽ കഴിഞ്ഞ അഞ്ചുപതിറ്റാണ്ടായി ദേശീയ മലേറിയ ഗവേഷണ സ്ഥാപനം വഹിച്ച പങ്കും രാഷ്ട്രപതി ചൂണ്ടിക്കാട്ടി.

മലേറിയ നിയന്ത്രണത്തിൽ ഇന്ത്യയ്ക്ക് ശ്രദ്ധേയമായ മുന്നേറ്റം
ഇന്ത്യയുൾപ്പെടെ ലോകത്തെ പല രാജ്യങ്ങളിലും ഏറെക്കാലമായി ഗുരുതരമായ പൊതുജനാരോഗ്യ വെല്ലുവിളിയാണ് മലേറിയയെന്ന് രാഷ്ട്രപതി പറഞ്ഞു. സ്വാതന്ത്ര്യം ലഭിച്ച സമയത്ത് നമ്മുടെ രാജ്യത്തെ ഏറ്റവും രൂക്ഷമായ ആരോഗ്യപ്രശ്നങ്ങളിൽ ഒന്നായിരുന്നു ഇത്. കഴിഞ്ഞ ഏതാനും വർഷങ്ങളിൽ മലേറിയ നിയന്ത്രണത്തിൽ ഇന്ത്യ ശ്രദ്ധേയമായ പുരോഗതി നേടിയെന്നത് ആശ്വാസകരമാണ്. മെച്ചപ്പെട്ട ആരോഗ്യസേവനങ്ങൾ, ആധുനിക രോഗനിർണയ സാങ്കേതികവിദ്യകൾ, ഫലപ്രദമായ മരുന്നുകൾ, കൊതുകുനിയന്ത്രണ പ്രവർത്തനങ്ങൾ, ജനപങ്കാളിത്തം എന്നിവ രോഗവ്യാപനം തടയുന്നതിൽ പ്രധാന പങ്കുവഹിച്ചു.
മലേറിയ നിർമാർജനത്തിലേക്കുള്ള ഇന്ത്യയുടെ മുന്നേറ്റത്തിന് ആഗോള അംഗീകാരവും ലഭിച്ചു. ലോകാരോഗ്യ സംഘടനയുടെ ‘ഹൈ ബർഡൻ ടു ഹൈ ഇംപാക്ട്’ വിഭാഗത്തിൽനിന്ന് 2024ൽ ഇന്ത്യ പുറത്തുവന്നു. പൊതുജനാരോഗ്യ പദ്ധതികൾ, ശാസ്ത്രജ്ഞർ, ആരോഗ്യപ്രവർത്തകർ, ജനങ്ങൾ എന്നിവരുടെ കൂട്ടായ പരിശ്രമമാണ് ഈ നേട്ടത്തിന് വഴിയൊരുക്കിയത്. മലേറിയക്കെതിരായ ദീർഘകാല പോരാട്ടത്തിൽ ദേശീയ മലേറിയ ഗവേഷണ സ്ഥാപനം നിർണായക പങ്കുവഹിച്ചു. മലേറിയ പരാദങ്ങൾ, കൊതുകുകൾ, രോഗവാഹക നിയന്ത്രണം, കീടനാശിനികളോടുള്ള പ്രതിരോധശേഷി, ജനപങ്കാളിത്തത്തോടെയുള്ള രോഗനിരീക്ഷണം തുടങ്ങിയ മേഖലകളിൽ കഴിഞ്ഞ അഞ്ചുപതിറ്റാണ്ടായി സ്ഥാപനം വഴികാട്ടിയായ ഗവേഷണങ്ങൾ നടത്തി.

കൊതുകുകളുടെ പ്രജനനകേന്ദ്രങ്ങൾ ഇല്ലാതാക്കണം
കാലാവസ്ഥാ വ്യതിയാനം, ആസൂത്രണമില്ലാത്ത നഗരവൽക്കരണം, കീടനാശിനികളോടുള്ള കൊതുകുകളുടെ പ്രതിരോധശേഷി വർധിക്കുന്നത് എന്നിവ മലേറിയ നിർമാർജനത്തിന് പുതിയ തടസ്സങ്ങളാകാമെന്ന് രാഷ്ട്രപതി പറഞ്ഞു. ഇത്തരം സാഹചര്യങ്ങളിൽ ആരോഗ്യപ്രവർത്തകരുടെ പരിശ്രമംകൊണ്ടുമാത്രം മലേറിയയുടെ വ്യാപനം തടയാനാകില്ല.
വെള്ളം കെട്ടിനിൽക്കുന്നത് തടയുക, കൊതുകുകൾ പെരുകുന്ന ഇടങ്ങൾ ഇല്ലാതാക്കുക, പരിസ്ഥിതി പരിപാലിക്കുക എന്നിവയിലും ശ്രദ്ധ വേണം. നയരൂപീകരണത്തിന് ചുമതലയുള്ളവരും ശാസ്ത്രസമൂഹവും ഈ ദിശയിൽ കൂട്ടായ പരിശ്രമം നടത്തുന്നുണ്ടെന്ന വിശ്വാസവും രാഷ്ട്രപതി പ്രകടിപ്പിച്ചു.
ഡെങ്കിപ്പനിയും വലിയ വെല്ലുവിളി
സമീപവർഷങ്ങളിൽ ഡെങ്കിപ്പനിയും രാജ്യത്ത് വലിയ വെല്ലുവിളിയായി മാറിയെന്ന് രാഷ്ട്രപതി പറഞ്ഞു. ആഗോളതാപനവും മൺസൂൺ രീതികളിലെ മാറ്റങ്ങളും ഈ വെല്ലുവിളി കൂടുതൽ രൂക്ഷമാക്കാൻ സാധ്യതയുണ്ട്. ക്ഷയം, കുഷ്ഠം, കാലാ അസർ തുടങ്ങിയ രോഗങ്ങൾക്കെതിരായ പോരാട്ടത്തിന് ഐസിഎംആറിന്റെ ഗവേഷണങ്ങളും പഠനങ്ങളും ദിശാബോധം നൽകി. ദേശീയ ആരോഗ്യപരിപാടികൾക്ക് രൂപം നൽകുന്നതിലും സ്ഥാപനം പ്രധാന പങ്കുവഹിച്ചു.
കൊവിഡ് മഹാമാരിക്കാലത്ത് വളരെ കുറഞ്ഞ സമയത്തിനുള്ളിൽ രാജ്യവ്യാപകമായി പരിശോധനാശൃംഖല ഒരുക്കാൻ ഐസിഎംആറിന് കഴിഞ്ഞു. ഇന്ത്യയുടെ ആദ്യ തദ്ദേശീയ കൊവിഡ് വാക്സിൻ വികസിപ്പിക്കുന്നതിലും സ്ഥാപനം പങ്കാളിയായി. ഡെങ്കിപ്പനി പോലുള്ള രോഗങ്ങളുടെ നിർണയത്തിനായും ഐസിഎംആർ ഫലപ്രദമായ നടപടികൾ സ്വീകരിക്കുന്നുണ്ടെന്ന വിശ്വാസം രാഷ്ട്രപതി പ്രകടിപ്പിച്ചു.

ആരോഗ്യമുള്ള ഇന്ത്യയ്ക്കായി സ്ഥാപനങ്ങൾ കൈകോർക്കണം
കഴിഞ്ഞകാല നേട്ടങ്ങൾ ഓർത്തെടുക്കാനും അഭിമാനിക്കാനുമുള്ള അവസരം മാത്രമല്ല സുവർണജൂബിലിയെന്ന് രാഷ്ട്രപതി പറഞ്ഞു. ഭാവിക്കായി നിർണായക ലക്ഷ്യങ്ങൾ നിശ്ചയിക്കാനുള്ള അവസരം കൂടിയാണിത്. 2047ഓടെ വികസിത ഭാരതം കെട്ടിപ്പടുക്കുകയെന്ന ലക്ഷ്യത്തോടെയാണ് രാജ്യം മുന്നോട്ടുപോകുന്നത്.
ആരോഗ്യവും കരുത്തുമുള്ള ഇന്ത്യയെ രൂപപ്പെടുത്താൻ ഗവേഷണ സ്ഥാപനങ്ങൾ, സാങ്കേതിക-ഉന്നത വിദ്യാഭ്യാസ കേന്ദ്രങ്ങൾ, വ്യവസായ മേഖല എന്നിവ തമ്മിലുള്ള ശക്തമായ സഹകരണം അനിവാര്യമാണ്. ഇത്തരം സഹകരണത്തിന് ഐസിഎംആർ പോലുള്ള പ്രമുഖ സ്ഥാപനങ്ങൾക്ക് നേതൃത്വം നൽകാനാകും. ഗവേഷണം, സഹകരണം, നൂതന ആശയങ്ങൾ എന്നിവയിലൂടെ വികസിത ഭാരതത്തിന്റെ ആരോഗ്യലക്ഷ്യങ്ങൾ കൈവരിക്കാൻ ഐസിഎംആറും അനുബന്ധ സ്ഥാപനങ്ങളും സംഭാവന നൽകുമെന്ന വിശ്വാസവും രാഷ്ട്രപതി പ്രകടിപ്പിച്ചു.

