ദില്ലി:യാക്കോബായ-ഓർത്തഡോക്സ് പള്ളിത്തർക്കത്തില് ഹൈക്കോടതി ഉത്തരവിനെതിരെ സര്ക്കാര് സുപ്രീം കോടതിയില് അപ്പീല് നല്കി.തര്ക്കത്തിലുള്ള ആറ് പള്ളികള് ഏറ്റെടുക്കണമെന്ന ഉത്തരവിനെതിരെയാണ് സര്ക്കാര് സുപ്രീം കോടതിയെ സമീപിച്ചത്. പള്ളികള് ഏറ്റെടുക്കുന്ന ഉത്തരവ് നടപ്പാക്കാൻ സാവകാശം തേടിയാണ് അപ്പീല്. ഏറ്റെടുക്കുന്നതില് ക്രമസമാധാന പ്രശ്നമുണ്ടെന്നും സര്ക്കാര് അപ്പീലില് വ്യക്തമാക്കി.
ഓര്ത്തഡോക്സ് സഭ തടസ ഹര്ജി നല്കി.
ഇതുമായി ബന്ധപ്പെട്ട് കോടതിയലക്ഷ്യ നടപടി സ്റ്റേ ചെയ്യണമെന്നും സര്ക്കാര് ആവശ്യപ്പെട്ടു. ഹൈക്കോടതി ഡിവിഷന് ബെഞ്ച് വിധിക്കെതിരെ യാക്കോബായ സഭയും അപ്പീല് നല്കിയിട്ടുണ്ട്. തങ്ങളുടെ ഭാഗം കേള്ക്കാതെ തീരുമാനമെടുക്കരുതെന്ന് ഓര്ത്തഡോക്സ് സഭ തടസ ഹര്ജിയും നല്കി.
പലവട്ടം ആവശ്യപ്പെട്ടിട്ടും ക്രമസമാധാന പ്രശ്നം പറഞ്ഞ് നടപടിയില് നിന്ന് സർക്കാർ പിൻമാറുകയായിരുന്നു.
അതേസമയം, ഉത്തരവ് നടപ്പാക്കാത്തതില് സംസ്ഥാന സർക്കാരിനെതിരെ ഹൈക്കോടതി കഴിഞ്ഞ ദിവസം കോടതിയലക്ഷ്യ നടപടികള് ആരംഭിച്ചിരുന്നു. സുപ്രീംകോടതി ഉത്തരവിന്റെ അടിസ്ഥാനത്തില് യാക്കോബായ സഭയുടെ കൈവശമുള്ള ആറ് പള്ളികള് ഏറ്റെടുക്കാൻ ഹൈക്കോടതി സിംഗിള് ബെഞ്ച് നിർദേശിച്ചിരുന്നു. പലവട്ടം ആവശ്യപ്പെട്ടിട്ടും ക്രമസമാധാന പ്രശ്നം പറഞ്ഞ് നടപടിയില് നിന്ന് സർക്കാർ പിന്മാറിയ സാഹചര്യത്തിലാണ് നടപടി. ചീഫ് സെക്രട്ടറി, എറണാകുളം, പാലക്കാട് ജില്ലാ കളക്ടർമാർ ഉള്പ്പെടെയുളള എതിർകക്ഷികള് അടുത്ത മാസം എട്ടിന് ഹൈക്കോടതിയില് ഹാജരാകണമെന്ന് കോടതി നിര്ദേശിച്ചിരുന്നു. ഇവർക്കെതിരെ കുറ്റം ചുമത്തുന്ന നടപടി അന്നുണ്ടാകുമെന്നും ജസ്റ്റീസ് വി ജി അരുണ് അറിയിച്ചിരുന്നു.
സർക്കാരിനെതിരെ കടുത്ത വിമർശനവുമായി ഹൈക്കോടതി
യാക്കോബായ- ഓർത്തഡോക്സ് പളളിത്തർക്കത്തില് സുപ്രീംകോടതി ഉത്തരവ് നടപ്പാക്കാത്ത സംസ്ഥാന സർക്കാരിനെതിരെ ഹൈക്കോടതി കടുത്ത വിമർശനമാണ് ഉന്നയിച്ചിരുന്നത്. ഓർത്തഡോക്സ്- യാക്കോബായ കേസില് മലങ്കര സഭയ്ക്ക് കീഴിലുള്ള എല്ലാ പള്ളികളും 1934 ലെ ഭരണഘടന പ്രകാരം ഭരിക്കപ്പെടണമെന്ന് 2017 ലാണ് സുപ്രീംകോടതി വിധിച്ചത്. 1934ലെ സഭ ഭരണഘടനയുടെ അടിസ്ഥാനത്തില് നിലനില്ക്കുന്ന സുപ്രീംകോടതി വിധി നിലവില് ഓർത്തഡോക്സ് വിഭാഗത്തിന് അനുകൂലമാണ്. .
