ന്യൂഡൽഹി  / 2026  / ഒക്ടോബർ 11 

യുവസംഗമത്തിന്റെ ഏഴാം ഘട്ടത്തിൽ അസമിലെത്തിയ തെലങ്കാനയിൽ നിന്നുള്ള യുവജനസംഘം സംസ്ഥാനത്തിന്റെ സാംസ്കാരിക പൈതൃകവും പാരമ്പര്യവും അടുത്തറിഞ്ഞു. കർണാടക കേന്ദ്ര സർവകലാശാലയുടെ നേതൃത്വത്തിലുള്ള സംഘം ഒക്ടോബർ നാലിന് ഗുവാഹത്തിയിലെത്തി. ഗുവാഹത്തി ഇന്ത്യൻ ഇൻസ്റ്റിറ്റ്യൂട്ട് ഓഫ് ടെക്നോളജി സംഘത്തെ ഹൃദ്യമായി സ്വീകരിച്ചു. ഒക്ടോബർ അഞ്ചിന് അസം ഗവർണർ ലക്ഷ്മൺ പ്രസാദ് ആചാര്യയുമായി സംഘം സംവദിച്ചു. രാജ്യത്തെ യുവജനങ്ങൾക്കിടയിൽ സാംസ്കാരികവും വൈകാരികവുമായ ബന്ധങ്ങൾ ശക്തിപ്പെടുത്താൻ കേന്ദ്ര വിദ്യാഭ്യാസ മന്ത്രാലയത്തിലെ ഉന്നത വിദ്യാഭ്യാസ വകുപ്പാണ് ഏക ഭാരതം ശ്രേഷ്ഠ ഭാരതം പദ്ധതിയുടെ ഭാഗമായി പരിപാടി സംഘടിപ്പിച്ചത്.

ഇരുപത് സംസ്ഥാനങ്ങളെ ബന്ധിപ്പിക്കുന്ന യുവസംഗമം

വിവിധ സംസ്ഥാനങ്ങളുടെയും കേന്ദ്രഭരണ പ്രദേശങ്ങളുടെയും സാംസ്കാരിക പൈതൃകം, പാരമ്പര്യം, വിദ്യാഭ്യാസ രംഗം, വികസന നേട്ടങ്ങൾ എന്നിവ പരിചയപ്പെടാൻ യുവസംഗമം യുവാക്കൾക്ക് അവസരമൊരുക്കുന്നു. പരസ്പരം പങ്കാളികളാക്കിയ ഇരുപത് സംസ്ഥാനങ്ങളെയും ഉന്നത വിദ്യാഭ്യാസ സ്ഥാപനങ്ങളെയും ഉൾപ്പെടുത്തിയാണ് പരിപാടി നടത്തുന്നത്. പരസ്പര ധാരണ വളർത്താനും ദേശീയ ഐക്യം ശക്തിപ്പെടുത്താനുമാണ് ഇതിലൂടെ ലക്ഷ്യമിടുന്നത്.

യോഗയിലൂടെ ഉന്മേഷത്തോടെ തുടക്കം

ഒക്ടോബർ അഞ്ചിന് യോഗ പരിശീലനത്തോടെയാണ് തെലങ്കാന സംഘം അസമിലെ ആ ദിവസത്തെ പരിപാടികൾ ആരംഭിച്ചത്. ആരോഗ്യത്തിനും മനസ്സിന്റെ ഏകാഗ്രതയ്ക്കും പ്രാധാന്യം നൽകി ഉന്മേഷത്തോടെ ദിവസം തുടങ്ങാൻ യുവപ്രതിനിധികൾക്ക് ഇതിലൂടെ അവസരം ലഭിച്ചു. ഇന്ത്യയുടെ പരമ്പരാഗത അറിവിന്റെയും സാംസ്കാരിക പൈതൃകത്തിന്റെയും പ്രധാന ഭാഗമായ യോഗ നേരിട്ട് അനുഭവിക്കാനും അവർക്ക് കഴിഞ്ഞു.

അസമിന്റെ പൈതൃകം പങ്കുവച്ച് ഗവർണർ

അസം ഗവർണർ ലക്ഷ്മൺ പ്രസാദ് ആചാര്യയുമായുള്ള സംവാദം സംസ്ഥാനത്തിന്റെ സമ്പന്നമായ പൈതൃകം, പാരമ്പര്യം, സാംസ്കാരിക പ്രാധാന്യം എന്നിവ കൂടുതൽ മനസ്സിലാക്കാൻ യുവപ്രതിനിധികളെ സഹായിച്ചു. ഇന്ത്യയുടെ വൈവിധ്യമാർന്ന സാംസ്കാരിക പശ്ചാത്തലത്തെക്കുറിച്ചുള്ള അവരുടെ ധാരണയും ഇതിലൂടെ വിപുലമായി. രാജ്യത്തിന്റെ വിവിധ ഭാഗങ്ങളിലുള്ള യുവാക്കൾ തമ്മിലുള്ള ബന്ധം ശക്തിപ്പെടുത്തേണ്ടതിന്റെ പ്രാധാന്യവും സംവാദത്തിലൂടെ അവർ അടുത്തറിഞ്ഞു.

വൈവിധ്യത്തിലൂടെ ഐക്യത്തിലേക്ക്

രാജ്യത്തിന്റെ വൈവിധ്യം അടുത്തറിയാനും സ്വന്തം സംസ്ഥാനത്തിന് പുറത്തുള്ള സമൂഹങ്ങളുമായി ഇടപഴകാനും ഇന്ത്യയുടെ പൊതുവായ സാംസ്കാരിക പൈതൃകത്തെ കൂടുതൽ വിലമതിക്കാനും യുവാക്കളെ പ്രേരിപ്പിക്കുകയാണ് യുവസംഗമത്തിന്റെ പ്രധാന ലക്ഷ്യം. തെലങ്കാനയും അസമും തമ്മിലുള്ള ഈ കൈമാറ്റപരിപാടി ആ ലക്ഷ്യമാണ് പ്രതിഫലിപ്പിക്കുന്നത്. പുതിയ കാര്യങ്ങൾ അറിയാനും ബന്ധങ്ങൾ വളർത്താനും നീണ്ടുനിൽക്കുന്ന ഓർമകൾ സൃഷ്ടിക്കാനും ഇത്തരം പരിപാടികൾ യുവാക്കൾക്ക് അർഥവത്തായ അവസരങ്ങൾ നൽകുന്നു. ഏക ഭാരതം ശ്രേഷ്ഠ ഭാരതം എന്ന വിശാല കാഴ്ചപ്പാടിന് കരുത്തേകുന്നതിനൊപ്പം വൈവിധ്യത്തിലെ ഐക്യത്തിന്റെ ബന്ധങ്ങളും ഇവ ശക്തിപ്പെടുത്തുന്നു.