കോഴിക്കോട്: സ്ത്രീ വിരുദ്ധ പരാമർശം വിവാദമായതിന് പിന്നാലെ വിശദീകരണവുമായി കാന്തപുരം എ.പി. അബൂബക്കർ മുസ്‌ലിയാർ. ആത്മീയ ചർച്ചകളെ വിവാദങ്ങളിലേക്കും വിഭാഗീയതയിലേക്കും വഴിതിരിച്ചുവിടാനുള്ള ശ്രമങ്ങൾ തിരിച്ചറിയണമെന്ന് അദ്ദേഹം പറഞ്ഞു. പ്രവർത്തകർ പ്രകോപനങ്ങളിൽ വീഴാതെ പക്വതയോടെയും സംയമനത്തോടെയും പ്രതികരിക്കണമെന്നും കാന്തപുരം ആവശ്യപ്പെട്ടു.

ആത്മീയ ചർച്ചകളെ വിവാദമാക്കരുത്

സംവാദങ്ങൾ ആശയങ്ങളെ നിഷ്പക്ഷമായി വിലയിരുത്താനും പുതിയ കാര്യങ്ങൾ പഠിക്കാനുമുള്ള ആരോഗ്യകരമായ വേദികളാകണമെന്ന് കാന്തപുരം പറഞ്ഞു. അറിവന്വേഷണങ്ങളെ അട്ടിമറിച്ച് സമൂഹത്തിൽ ഭിന്നത വളർത്താനുള്ള ശ്രമങ്ങളെ ജാഗ്രതയോടെ സമീപിക്കണം. വൈകാരിക പ്രതികരണങ്ങൾ ഒഴിവാക്കി അച്ചടക്കത്തോടെ മുന്നോട്ടുപോകണമെന്നും അദ്ദേഹം പ്രവർത്തകരോട് ആവശ്യപ്പെട്ടു.

സ്ത്രീകളുടെ പങ്കാളിത്തം വിവാദമായിരുന്നു

നബിദിന ആഘോഷങ്ങളിൽ സ്ത്രീകളെ പങ്കെടുപ്പിച്ചതിനെ വിമർശിച്ച് മഹല്ലുകൾക്കും മദ്രസകൾക്കും നൽകിയ നിർദേശങ്ങളാണ് വിവാദമായത്. അന്യപുരുഷന്മാർക്കിടയിൽ വേദിയിലോ പൊതുഇടങ്ങളിലോ സ്ത്രീകളെ കൊണ്ടുവരരുതെന്നും ആഘോഷങ്ങൾ അതിരുകടക്കുന്നത് തടയണമെന്നും പ്രസ്താവനയിൽ പറഞ്ഞിരുന്നു. ഇതിനെതിരെ വിവിധ കോണുകളിൽനിന്ന് വിമർശനം ഉയർന്നിരുന്നു.

നാളെ നിലപാട് വിശദീകരിക്കും

വിവാദ പ്രസ്താവനയിൽ കാന്തപുരം നാളെ കോഴിക്കോട് നടക്കുന്ന മീലാദ് സമ്മേളനത്തിൽ കൂടുതൽ വിശദീകരണം നൽകുമെന്നാണ് വിവരം. മുഖ്യമന്ത്രിയുൾപ്പെടെയുള്ള വിമർശനങ്ങൾക്കും മറുപടി നൽകുമെന്നാണ് സൂചന. അതേസമയം, ഇന്നലെ തൃശൂരിലെ മീലാദ് സമ്മേളനത്തിൽ കാന്തപുരം നിലപാട് മയപ്പെടുത്തിയിരുന്നു.

‘സ്ത്രീകളെ കുഴിച്ചുമൂടണമെന്ന് പറയുന്നവരല്ല’

സ്ത്രീകളെ കുഴിച്ചുമൂടണമെന്ന് പറയുന്നവരല്ല തങ്ങളെന്നും ഇസ്‌ലാം അങ്ങനെ പറയുന്നില്ലെന്നും കാന്തപുരം ഇന്നലെ വ്യക്തമാക്കിയിരുന്നു. സ്ത്രീകൾക്ക് രണ്ടാം സ്ഥാനം നൽകുന്നു എന്ന വാദവും അദ്ദേഹം തള്ളി. പെൺകുട്ടികൾക്കായി മദ്രസകളും സ്‌കൂളുകളും ഉൾപ്പെടെ നിരവധി സ്ഥാപനങ്ങൾ നടത്തുന്നുണ്ടെന്നും അനാഥരായ പെൺകുട്ടികൾക്ക് സംരക്ഷണം നൽകുന്നുണ്ടെന്നും അദ്ദേഹം പറഞ്ഞു.