ഇന്ത്യ–യുകെ  സമഗ്ര സാമ്പത്തിക-വ്യാപാര കരാറിന്റെ സാധ്യതകൾ പ്രയോജനപ്പെടുത്താൻ കമ്പനികളോട് കേന്ദ്രമന്ത്രി

ലണ്ടൻ, 2026 ജൂൺ 28

ഇന്ത്യ–യുകെ  സമഗ്ര സാമ്പത്തിക-വ്യാപാര കരാറിലൂടെ ലഭിക്കുന്ന അവസരങ്ങൾ ദീർഘകാല വ്യാപാര വളർച്ചയാക്കി മാറ്റാൻ ഇന്ത്യൻ കമ്പനികൾ കൂടുതൽ സഹകരണം ശക്തമാക്കണമെന്ന് കേന്ദ്ര വാണിജ്യ-വ്യവസായ മന്ത്രി പിയൂഷ് ഗോയൽ ആവശ്യപ്പെട്ടു. ലണ്ടനിൽ നടന്ന ഇന്ത്യ–യുണൈറ്റഡ് കിംഗ്ഡം പുരോഗതിയിലെ പങ്കാളികൾ വ്യാപാര സമ്മേളനത്തിലായിരുന്നു മന്ത്രിയുടെ ആഹ്വാനം. ഇരു രാജ്യങ്ങളിലെയും പ്രമുഖ വ്യവസായ പ്രതിനിധികൾ സമ്മേളനത്തിൽ പങ്കെടുത്തു.

സമഗ്ര സാമ്പത്തിക-വ്യാപാര കരാർ ഉഭയകക്ഷി വ്യാപാരത്തിനും നിക്ഷേപത്തിനും വലിയ മാറ്റമുണ്ടാക്കുന്ന ചട്ടക്കൂടാണെന്ന് പ്രതിനിധികൾ വിലയിരുത്തി. ദീർഘകാല നിക്ഷേപം, സാങ്കേതിക സഹകരണം, നവീകരണം, ശക്തമായ വിതരണ ശൃംഖല, സാമ്പത്തിക സഹകരണം എന്നിവ വികസിപ്പിക്കാനുള്ള സാധ്യതകൾ ചർച്ചയായി. ചെറുകിട-ഇടത്തരം സംരംഭങ്ങളിൽ കരാറിനെക്കുറിച്ചുള്ള അവബോധം വർധിപ്പിക്കണമെന്നും, നിയന്ത്രണ നടപടികളും സർട്ടിഫിക്കേഷൻ നടപടികളും ലളിതമാക്കണമെന്നും, വ്യവസായങ്ങൾ തമ്മിലുള്ള സഹകരണവും വൈദഗ്ധ്യമുള്ള മനുഷ്യവിഭവങ്ങളുടെ സഞ്ചാരവും വർധിപ്പിക്കണമെന്നും പ്രതിനിധികൾ ആവശ്യപ്പെട്ടു. ചടങ്ങിൽ നാല് വിജ്ഞാന റിപ്പോർട്ടുകളും മന്ത്രി പ്രകാശനം ചെയ്തു.

ആരോഗ്യം, വികസിത നിർമാണം, ശുദ്ധ ഊർജം, ശാസ്ത്ര-സാങ്കേതികവിദ്യ, സേവന മേഖല, ഉപഭോക്തൃ ഉൽപ്പന്നങ്ങൾ എന്നിവയെക്കുറിച്ചുള്ള മേഖലാതല ചർച്ചകളിൽ നിന്നുള്ള ശുപാർശകളും സമ്മേളനത്തിൽ അവതരിപ്പിച്ചു. തുടർന്ന് യുണൈറ്റഡ് കിംഗ്ഡത്തിലെ രണ്ടുദിവസത്തെ വ്യാപാര കൂടിക്കാഴ്ചകൾ ഇന്ത്യൻ വ്യാപാര പ്രതിനിധി സംഘത്തോടൊപ്പമുള്ള സംവാദത്തോടെ സമാപിച്ചു. വിവിധ മേഖലകളിൽ കണ്ടെത്തിയ വ്യാപാര അവസരങ്ങളും സാധ്യതയുള്ള പങ്കാളികളുമായുള്ള ചർച്ചകളിലെ അനുഭവങ്ങളും പ്രതിനിധികൾ പങ്കുവച്ചു. ഇരു സർക്കാരുകളും വ്യവസായ മേഖലയും കരാറിനെ പ്രായോഗിക വ്യാപാര-നിക്ഷേപ നേട്ടങ്ങളാക്കി മാറ്റാനുള്ള പ്രതിബദ്ധത വീണ്ടും ഉറപ്പിച്ചതായി പരിപാടി വിലയിരുത്തി.