ന്യൂഡൽഹി, ജൂലൈ 3
പാകിസ്ഥാൻ പിന്തുണയോടെയുള്ള ഭീകരവാദ പ്രവർത്തനങ്ങളെ ഇന്ത്യൻ പ്രധാനമന്ത്രി നരേന്ദ്ര മോദിയും ജപ്പാൻ പ്രധാനമന്ത്രി സനേ തകൈച്ചിയും ശക്തമായി അപലപിച്ചു. ന്യൂഡൽഹിയിലെ ഹൈദരാബാദ് ഹൗസിൽ നടന്ന ഇന്ത്യ-ജപ്പാൻ വാർഷിക ഉച്ചകോടിക്ക് ശേഷമാണ് ഇരുനേതാക്കളും സംയുക്ത നിലപാട് വ്യക്തമാക്കിയത്. പഹൽഗാം ഭീകരാക്രമണത്തെയും 2025 നവംബറിൽ ഡൽഹിയെ നടുക്കിയ ചെങ്കോട്ട (റെഡ് ഫോർട്ട്) സ്ഫോടനത്തേയും നേതാക്കൾ പ്രസ്താവനയിൽ അപലപിച്ചു.
ഭീകരസംഘടനകൾക്കെതിരെ കർശന നടപടി വേണം
ലഷ്കർ-ഇ-ത്വയ്ബ, ജൈഷ്-ഇ-മൊഹമ്മദ് തുടങ്ങിയ പാകിസ്ഥാൻ ആസ്ഥാനമായ ഭീകരസംഘടനകൾക്കെതിരെ ആഗോളതലത്തിൽ ഏകോപിത നടപടി വേണമെന്ന് മോദിയും തകൈച്ചിയും ആവശ്യപ്പെട്ടു. ഐക്യരാഷ്ട്രസഭയുടെ ഭീകരവാദപ്പട്ടികയിലുള്ള അൽ ഖ്വയ്ദ, ഐഎസ് (ദായേഷ്), ലെറ്റ്, ജെഇഎം എന്നിവയുൾപ്പെടെയുള്ള സംഘടനകൾക്കും അവയുടെ അനുബന്ധ ഗ്രൂപ്പുകൾക്കുമെതിരെ കർശന നടപടി സ്വീകരിക്കണമെന്ന് സംയുക്ത പ്രസ്താവനയിൽ വ്യക്തമാക്കുന്നു. ഭീകരപ്രവർത്തകർ, അതിന്റെ ആസൂത്രകർ, സാമ്പത്തിക സഹായം നൽകുന്നവർ എന്നിവരെ എത്രയും വേഗം നിയമത്തിന് മുന്നിൽ കൊണ്ടുവരണമെന്നും ഇരുരാജ്യങ്ങളും ആവശ്യപ്പെട്ടു.
ഉഭയകക്ഷി ബന്ധം ശക്തമാക്കാൻ പുതിയ നീക്കം
ഇന്ത്യ-ജപ്പാൻ വാർഷിക ഉച്ചകോടിയിൽ പങ്കെടുക്കുന്നതിനായി ജൂലൈ 1 മുതൽ 3 വരെയുള്ള ഔദ്യോഗിക സന്ദർശനത്തിനായാണ് ജപ്പാൻ പ്രധാനമന്ത്രി സനേ തകൈച്ചി ഇന്ത്യയിലെത്തിയത്. ജപ്പാന്റെ ആദ്യ വനിതാ പ്രധാനമന്ത്രിയായ തകൈച്ചിയെ “ഇളയ സഹോദരി” എന്നാണ് പ്രധാനമന്ത്രി നരേന്ദ്ര മോദി വിശേഷിപ്പിച്ചത്. വിജയകരമായി പൂർത്തിയായ ഉച്ചകോടിക്ക് പിന്നാലെ ഇരുരാജ്യങ്ങളും തമ്മിലുള്ള സാമ്പത്തിക, പ്രതിരോധ, തന്ത്രപ്രധാന സഹകരണങ്ങൾ കൂടുതൽ ശക്തമാക്കാനുള്ള പുതിയ പദ്ധതികൾക്കും തുടക്കമായി.
