ന്യൂഡൽഹി, 2026 ജൂലൈ 2 –
മൂന്ന് സംസ്ഥാനങ്ങളിൽ ഉപതിരഞ്ഞെടുപ്പ് പ്രഖ്യാപിച്ചു
ബിഹാർ, ഗുജറാത്ത്, മധ്യപ്രദേശ് എന്നീ മൂന്ന് സംസ്ഥാനങ്ങളിലായി ഒഴിവുവന്ന നിയമസഭാ മണ്ഡലങ്ങളിലേക്കുള്ള ഉപതിരഞ്ഞെടുപ്പ് തീയതികൾ കേന്ദ്ര തിരഞ്ഞെടുപ്പ് കമ്മീഷൻ പ്രഖ്യാപിച്ചു. വോട്ടെടുപ്പ് ജൂലൈ 30-ന് നടക്കും. വോട്ടെണ്ണലും ഫലപ്രഖ്യാപനവും ഓഗസ്റ്റ് 3-നായിരിക്കും. വിവിധ കാരണങ്ങളാൽ പ്രതിനിധികൾ ഇല്ലാതായ മണ്ഡലങ്ങളിലേക്കാണ് ഇപ്പോൾ ഉപതിരഞ്ഞെടുപ്പിന് കളമൊരുങ്ങുന്നത്.
നാല് മണ്ഡലങ്ങൾ വിധിയെഴുതാൻ ഒരുങ്ങുന്നു
മൂന്ന് സംസ്ഥാനങ്ങളിലായി ആകെ നാല് മണ്ഡലങ്ങളിലാണ് വോട്ടെടുപ്പ് നടക്കുക. ബിഹാറിലെ ബാങ്കിപൂർ, മധ്യപ്രദേശിലെ ദതിയ, ഗുജറാത്തിലെ മഞ്ജൽപൂർ, ദേഡിയാപാഡ എന്നിവയാണ് ആ മണ്ഡലങ്ങൾ. ബാങ്കിപൂർ എം.എൽ.എ ആയിരുന്ന നിതിൻ നബിൻ രാജ്യസഭയിലേക്ക് തിരഞ്ഞെടുക്കപ്പെട്ടതിനെ തുടർന്നാണ് ബിഹാറിൽ ഒഴിവുവന്നത്. മധ്യപ്രദേശിൽ രാജേന്ദ്ര ഭാരതിയുടെ എം.എൽ.എ അംഗത്വം റദ്ദാക്കിയതും, ഗുജറാത്തിലെ മഞ്ജൽപൂരിൽ സിറ്റിങ് എം.എ.ൽ.എ യോഗേഷ് പട്ടേലിന്റെ നിര്യാണവും, ദേഡിയാപാഡയിൽ ചൈതർ വസാവയ്ക്ക് അയോഗ്യത കൽപിച്ചതുമാണ് ഉപതിരഞ്ഞെടുപ്പിലേക്ക് നയിച്ചത്.
തിരഞ്ഞെടുപ്പ് ചൂടിലേക്ക് മൂന്ന് സംസ്ഥാനങ്ങളും
പ്രഖ്യാപനം വന്നതോടെ മൂന്ന് സംസ്ഥാനങ്ങളിലെയും പ്രമുഖ രാഷ്ട്രീയ പാർട്ടികൾ വൻ പ്രചാരണ പരിപാടികൾക്കായി ഒരുങ്ങിക്കഴിഞ്ഞു. നാമനിർദേശ പത്രിക സമർപ്പിക്കുന്നതുൾപ്പെടെയുള്ള നടപടികൾ ഉടൻ തന്നെ ആരംഭിക്കുമെന്ന് തിരഞ്ഞെടുപ്പ് കമ്മീഷൻ അറിയിച്ചു. വരാനിരിക്കുന്ന തിരഞ്ഞെടുപ്പ് ഫലങ്ങൾ അതത് സംസ്ഥാനങ്ങളിലെ രാഷ്ട്രീയ സമവാക്യങ്ങളും ജനവികാരവും അളക്കുന്നതിൽ നിർണായകമാകുമെന്നാണ് രാഷ്ട്രീയ നിരീക്ഷകരുടെ വിലയിരുത്തൽ.
