ആണവോർജത്തിൽ നിന്നുള്ള താപം ഉപയോഗിച്ച് ഹൈഡ്രജൻ ഉൽപാദിപ്പിക്കുന്ന ലോകത്തിലെ ആദ്യ കേന്ദ്രത്തിന് കൽപ്പാക്കത്തെ ഇന്ദിരാഗാന്ധി ആണവ ഗവേഷണ കേന്ദ്രത്തിൽ തുടക്കമായി. ആണവോർജ വകുപ്പ് സെക്രട്ടറി അജിത് കുമാർ മൊഹന്തി കേന്ദ്രം ഉദ്ഘാടനം ചെയ്തു. രാജ്യത്തെ ഏക പ്രവർത്തനക്ഷമ അതിവേഗ ബ്രീഡർ പരീക്ഷണ റിയാക്ടറിൽ നിന്നുള്ള താപമാണ് ഈ സംവിധാനത്തിൽ ഉപയോഗിക്കുന്നത്. ശുദ്ധ ഊർജ മേഖലയിലെ ഇന്ത്യയുടെ പ്രധാന നേട്ടമായാണ് ഇതിനെ വിലയിരുത്തുന്നത്.

മുംബൈയിലെ ഭാഭാ ആണവ ഗവേഷണ കേന്ദ്രം തദ്ദേശീയമായി വികസിപ്പിച്ച സാങ്കേതികവിദ്യയാണ് ഈ പദ്ധതിയുടെ അടിസ്ഥാനം. ഇന്ദിരാഗാന്ധി ആണവ ഗവേഷണ കേന്ദ്രവും ഭാഭാ ആണവ ഗവേഷണ കേന്ദ്രവും ചേർന്നാണ് പദ്ധതി യാഥാർഥ്യമാക്കിയത്. ആണവതാപം ഉപയോഗിച്ച് ഹൈഡ്രജൻ ഉൽപാദിപ്പിക്കാൻ കഴിയുമെന്നത് ഈ കേന്ദ്രം തെളിയിക്കും. കുറഞ്ഞ പ്രവർത്തന താപനിലയും കൂടുതൽ കാര്യക്ഷമതയും ഈ രീതിയുടെ പ്രത്യേകതകളാണ്. ഇതിലൂടെ പരമ്പരാഗത ഹൈഡ്രജൻ ഉൽപാദന രീതികളിലെ ഹരിതഗൃഹ വാതക പുറന്തള്ളലും ജൈവ ഇന്ധന ആശ്രയവും കുറയ്ക്കാനാകുമെന്നാണ് അധികൃതർ പറയുന്നത്.

ആയിരത്തി തൊള്ളായിരത്തി എഴുപത്തൊന്നിൽ സ്ഥാപിതമായ ഇന്ദിരാഗാന്ധി ആണവ ഗവേഷണ കേന്ദ്രം രാജ്യത്തെ അതിവേഗ ബ്രീഡർ റിയാക്ടർ പദ്ധതിയുടെ പ്രധാന ഗവേഷണ സ്ഥാപനമാണ്. നാല് പതിറ്റാണ്ടിലേറെ ഗവേഷണവും സാങ്കേതിക പരിചയവും ഈ നേട്ടത്തിന് വഴിയൊരുക്കിയെന്ന് അധികൃതർ വ്യക്തമാക്കി. ഈ കേന്ദ്രത്തിന്റെ പ്രവർത്തനം ഭാവിയിൽ വലിയ തോതിലുള്ള ആണവസഹായിത ഹൈഡ്രജൻ ഉൽപാദന ഗവേഷണത്തിനും വാണിജ്യവൽക്കരണത്തിനുമുള്ള അനുഭവം നൽകുമെന്നും അറിയിച്ചു.

.