മലപ്പുറം, 2026 ജൂൺ 26 –

മഞ്ചേരിയിൽ ഇന്നോവ കാറിന്റെ ബോണറ്റിൽ ഒളിപ്പിച്ച് കടത്തുകയായിരുന്ന പതിനാറര കിലോ കഞ്ചാവുമായി യുവാവ് പിടിയിലായി. മേലാറ്റൂർ എടപ്പറ്റ സ്വദേശി നിഹാൽ മുഹമ്മദ് (23) ആണ് അറസ്റ്റിലായത്. ബുധനാഴ്ച രാത്രി എട്ടരയോടെ മഞ്ചേരി ചമയം ജംഗ്ഷനിൽ നാട്ടുകാർ വാഹനം തടഞ്ഞാണ് പ്രതിയെ പിടികൂടിയത്.

പാണ്ടിക്കാട് എക്സൈസും പൊലീസും നടത്തിയ പരിശോധനയ്ക്കിടെ വാഹനം നിർത്താതെ രക്ഷപ്പെടാൻ ശ്രമിക്കുകയായിരുന്നു. പിന്നാലെ പൊലീസും എക്സൈസും പിന്തുടർന്നു. അമിതവേഗത്തിൽ രക്ഷപ്പെടാൻ ശ്രമിച്ച പ്രതിയുടെ വാഹനം നിരവധി വാഹനങ്ങളിൽ ഇടിച്ചു. ഒടുവിൽ നാട്ടുകാർ വാഹനം തടഞ്ഞുനിർത്തിയതോടെ പ്രതി കാറിൽ നിന്ന് ഇറങ്ങി ഓടി. എന്നാൽ നാട്ടുകാർ പിന്നാലെയോടി പിടികൂടി പൊലീസിന് കൈമാറി.

പരിശോധനയിൽ കാറിന്റെ ബോണറ്റിനുള്ളിൽ അഞ്ച് വലിയ പാക്കറ്റുകളിലാക്കി ഒളിപ്പിച്ച നിലയിലാണ് പതിനാറര കിലോ കഞ്ചാവ് കണ്ടെത്തിയത്. സംഭവത്തിൽ പൊലീസ് കൂടുതൽ അന്വേഷണം ആരംഭിച്ചു.