കാസർഗോഡ്, 2026 ജൂൺ 25 –

കേരള കേന്ദ്ര സർവകലാശാല വൈസ് ചാൻസലർ സിന്ധു പി. അൽഗൂർ ആർ.എസ്.എസ് പരിപാടിയിൽ മുഖ്യാതിഥിയായി പങ്കെടുത്തത് വിവാദമായി. കാസർഗോഡ് കാഞ്ഞങ്ങാട്ട് ബുധനാഴ്ച നടന്ന പരിപാടിയിലാണ് വൈസ് ചാൻസലർ പങ്കെടുത്തത്. സർവകലാശാല രജിസ്ട്രാർ ഇൻ ചാർജും ചടങ്ങിൽ സന്നിഹിതനായിരുന്നു.

നഗരത്തിലെ സ്വകാര്യ ഹോട്ടലിൽ നടന്ന പരിപാടിയിൽ നിരവധി ആർ.എസ്.എസ് നേതാക്കളും പ്രവർത്തകരും പങ്കെടുത്തു. ചടങ്ങിന്റെ ഭാഗമായി സംഘടനയുടെ ചരിത്രം അവതരിപ്പിക്കുന്ന സിനിമയുടെ പ്രദർശനവും നടന്നു.

ഉന്നത വിദ്യാഭ്യാസ സ്ഥാപനത്തിന്റെ തലവൻ പരസ്യമായി ആർ.എസ്.എസ് വേദി പങ്കിട്ടതിനെതിരെ വിവിധ കോണുകളിൽ നിന്ന് വിമർശനം ഉയർന്നിട്ടുണ്ട്. നേരത്തെയും ആർ.എസ്.എസ് പരിപാടിയിൽ മൂന്ന് വൈസ് ചാൻസലർമാർ പങ്കെടുത്തത് വലിയ വിവാദമായിരുന്നു. ഈ സംഭവവും പുതിയ രാഷ്ട്രീയ, അക്കാദമിക ചർച്ചകൾക്ക് വഴിവെച്ചിരിക്കുകയാണ്.